Ripërdorim apo riciklim i plastikës? Studiues të ndryshëm kanë mendime të ndara se cilën metodë duhet përdorur, për të reduktuar sasinë e plastikës. Më shumë se 430 milionë tonë plastikë prodhohen çdo vit, dy të tretat e të cilave hidhen vetëm pas një përdorimi.
Nikki Murseli nga kompania DyvoLab mendon se riciklimi i plastikës nuk është treguar efikas, andaj edhe duhet menduar më shumë për ripërdorimin e saj. Në një debat të organizuar nga Balkan Green Foundation (BGF) për të shënuar Ditën e Tokës, që sivjet ka moton “Planeti kundër Plastikës”, Murseli shpjegon pse sipas saj riciklimi i plastikës është një mit.
“Pres se ka nisur përdorimi i plastikës në vitin 1950 deri më sot kemi arritur diku 3 miliardë metrikë mbeturina plastike të dhënat tregojnë që vetëm 9 përqind e tyre janë ricikluar ndonjëherë dhe kjo tregon se ky sistem nuk funksionon. Ricklimit i kishim ndejt pak larg, sepse është më mirë me ripërdor plastikën, të shihen mënyrat e tjera me e kthy këtë produkt në një tjetër që do të përdoret tepër më gjatë. Në rastin tonë ne e kthejmë plastikën në çmimore, shpërblime, medalje dhe për të paktën 70 vjet e kemi shpëtuar për të mos e hedhur në mjedis.”
Mundesh me e lexu edhe...
BGF në këtë debat ka mbledhur kompani inovative kosovare që kanë përqafuar agjendën e gjelbër dhe nuk punojnë në projekte që dëmtojnë ambientin.
“Ne fokusohemi që të japim zgjidhje për hapësirat e gjelbra aty ku jetojmë, kryesisht në produkte të gjelbra urbane, disa prej tyre janë eko ulëset, gjelbërimi vertikal dhe fasadat e gjelbra. Ne kemi mbjellë 40 mijë bimë në tërë Kosovën, dhe ne nuk bëjmë kompromis te ekonomia qarkore dhe të gjitha bimët janë lokale, të fermerëve lokalë,” thotë Dion Deva nga kompania “Te Pema.”
Ndërsa një kompani tjetër në Prizren, ka zgjedhur të bëjë ekobiznes me trotinetë elektrikë, duke reduktuar ndotjen e ajrit në qytet.
“Ne për të mbrojtur ambientin po përdorim trotinetë elektrikë, për momentin jemi vetëm në Prizren, synojmë të shtrihemi në tërë Kosovën,” tha Ersan Paliçko nga kompania Casper Scooter.
Ndërsa llojin e biznesit mund ta kenë të ndryshëm, këto kompani kanë një gjë të përbashkët – ruajtjen e ambientit. E për këtë gjë ata thonë se duhet punuar secili nga pak në mënyrë që t’u jepet një e ardhme më e ndritur gjeneratave të ardhshme. /Katror.info
Përgatiti:
