Dua Lipa ndezi skenën në Auckland të Zelandës së Re gjatë koncertit të saj të fundit në kuadër të turneut “Radical Optimism”, ku u shfaq me një stil dhe energji mahnitëse.
Këngëtarja kosovare me famë botërore, Dua Lipa habiti fansat në Spark Arena të mbushur plot të premten mbrëma me një mysafir special dhe një duet me askënd tjetër përveç Neil Finn.
Në natën e fundit të turneut të saj në Australi dhe Zelandën e Re, pjesë e turneut “Radical Optimism”, Lipa u tha fansave se një nga pjesët që i kishte pëlqyer më shumë gjatë këtij turneu ishte ftesa që u bënte talenteve vendëse për t’u ngjitur në skenë me të, shkruan The New Zealand Herald.
29-vjeçarja i tha publikut në Auckland se ishte gati të këndonte “një nga këngët e mia më të preferuara, ndonjëherë”, përpara se të zbulonte se do ta performonte atë me një “legjendë të Zelandës së Re”.
Publiku shpërtheu në duartrokitje kur Lipa shpalli: “Duartrokitni… për Neil Finn”, dhe frontmeni i Crowded House doli nga ana e skenës.
Më pas, Finn dhe Lipa filluan një duet të këngës hit të Crowded House, Don’t Dream It’s Over, mes duartrokitjeve të zjarrta nga publiku, teksa të dy e kënduan me lojë e ndjeshmëri ndaj njëri-tjetrit.
Koncerti ishte nata e dytë e ndalesës së Dua Lipës në Zelandën e Re – e shtuar për shkak të “kërkesës jashtëzakonisht të madhe”.
Në shfaqjen e parë të saj të mërkurën mbrëma, fansat në Spark Arena u surprizuan me interpretimin e saj të këngës Royals nga Lorde, por ishte pikërisht paraqitja e së premtes që i çoi ata në ekstazë.
Ylli i pop-it performoi për herë të parë në Zelandën e Re në vitin 2018 si pjesë mbështetëse e turneut të Bruno Mars, dhe u rikthye sërish në vitin 2022 me turneun e saj Future Nostalgia.
Kësaj here, publiku ishte një përzierje interesante: adoleshentë të rinj të shoqëruar nga prindërit, të rinj në të njëzetat me veshje që përpiqeshin të rivalizonin stilin e Lipës, dhe milenialë që, pasi panë fizikun mahnitës të saj, ndoshta rezervuan menjëherë dy seanca Pilatesi.
E vetmja gjë që i bashkonte të gjithë ishte se pothuajse secili prej tyre po e dokumentonte përvojën për pak famë në rrjetet sociale.. /Katror.info
Përgatiti:
