Që nga hapja e parë të Zyrës së Shërbimit të Informacionit të SHBA-së në Kosovë më 1996, Shtetet e Bashkuara të Amerikës kanë qenë ndër partnerët më të afërt dhe më të angazhuar në mbështetjen e zhvillimit të vendit. Pas luftës së vitit 1999, Zyra Amerikane në Prishtinë veproi si mision diplomatik deri në shpalljen e pavarësisë së Kosovës më 2008, kur zyrtarisht u themelua Ambasada e SHBA-së në Prishtinë, shkruan Katror.info.
Në një përmbledhje historike në faqen zyrtare e Ambasadës Amerikane, theksohet se në shtator të vitit 2012, SHBA-të, së bashku me partnerët e Grupit Ndërkombëtar Drejtues, “njohën përparimin e jashtëzakonshëm që ka arritur Kosova, përfshirë zbatimin e dispozitave të planit të të Dërguarit Special Ahtisaari dhe inkorporimin e tyre në legjislacionin vendor”, çka çoi në përfundimin e pavarësisë së mbikëqyrur dhe shpërbërjen e Zyrës Civile Ndërkombëtare.
Që nga viti 1999, SHBA-të kanë qenë një kontribuues kyç në misionin paqeruajtës të NATO-s në Kosovë (KFOR), me trupa që vazhdojnë të jenë të pranishëm për të siguruar “një mjedis të sigurt dhe të qetë si dhe liri të lëvizjes për të gjithë qytetarët e Kosovës.” Gjithashtu, që nga viti 2008, SHBA-të kanë dërguar staf në Misionin e Sundimit të Ligjit të BE-së (EULEX), shënuar si hera e parë që SHBA-të marrin pjesë në një mision të Politikës së Përbashkët të Sigurisë dhe Mbrojtjes së BE-së.
Mundesh me e lexu edhe...
Nga viti 1999, qeveria amerikane ka investuar rreth 2 miliardë dollarë në Kosovë në fusha të ndryshme që përfshijnë zhvillimin institucional, sigurinë dhe infrastrukturën. Një simbol i këtij angazhimi afatgjatë është edhe godina e re e Ambasadës Amerikane, e ndërtuar në një hapësirë prej 12.4 hektarësh në lagjen Arbëria të Prishtinës, e inaugurua më 4 korrik 2019.
Ambasada thekson se godina e re “jo vetëm që përfaqëson platformën diplomatike të Qeverisë së SHBA-së, por gjithashtu përforcon misionin e saj duke ofruar një shembull të sigurt, të qëndrueshëm dhe teknologjikisht të avancuar të arkitekturës, inxhinierisë dhe dizajnit urban amerikan.”
Përmes pranisë së saj të vazhdueshme diplomatike, ushtarake dhe zhvillimore, Shtetet e Bashkuara vazhdojnë të luajnë një rol të rëndësishëm në përkrahjen e institucioneve dhe qytetarëve të Kosovës në rrugëtimin drejt një të ardhmeje demokratike dhe të qëndrueshme./Katror.info
Përgatiti:
