Shpesh kur lexon nëpër lajme për një “shërim”, në fund kupton se bëhet fjalë vetëm për një mundësi, apo për dikë që “duket sikur është shëruar”.
Por nga Palm Beach, Florida, vjen një histori ndryshe: 72-vjeçari Orlando Avendaño është shëruar plotësisht nga dridhjet e dorës që e kanë munduar për më shumë se 30 vjet. Dhe lajmi i mirë vazhdon — trajtimi zgjati vetëm disa orë dhe u mbulua tërësisht nga Medicare, program shtetëror i sigurimit shëndetësor në Shtetet e Bashkuara, që financohet nga qeveria federale, shkruan Good News Network.
Për më shumë se tri dekada, dridhjet i kishin pamundësuar veprimet më të thjeshta si të shkruante emrin apo të hante me pirun. Për të ngritur një gotë uji i duheshin të dyja duart, ndërsa për darkë përdorte lugë të madhe për të fshehur dridhjet. Por në Qendrën Mjekësore Delray, këto dridhje mund të zhduken me anë të një procedure me ultrazë të përqendruar — tashmë e miratuar dhe e disponueshme në shumë vende në SHBA. përcjell Katror.info.
Mundesh me e lexu edhe…
Procedura përdor valë zanore me frekuencë të lartë, të njëjtat që përdorin lakuriqët për orientim dhe mjekët për të parë fetusin gjatë shtatzënisë. Në këtë rast, ultrazëri shndërrohet në një teknologji precize përmes një pajisjeje që vendoset në kokë, të quajtur Neuravive. Kjo pajisje dërgon me saktësi valët ultrasonike në pjesën e saktë të trurit. Pajisja është zhvilluar nga kompania Insightec dhe drejtohet përmes rezonancës magnetike.
Avendaño shkoi herët në mëngjes në spital. Pas vendosjes së pajisjes dhe futjes në rezonancë magnetike, neurokirurgu Dr. Lloyd Zucker identifikoi zonën e trurit ku fillonin dridhjet. Teknologjia krijoi një dëmtim të vogël në atë zonë, duke e ndërprerë menjëherë dridhjen.
Pa pasur nevojë për operacion apo qetësues, pas vetëm disa orësh Avendaño doli nga spitali dhe ngriti dorën: e qëndrueshme, pa asnjë lëkundje.
“Oh Zot, është e pabesueshme,” tha ai, sapo përfundoi procedura. E gjithë kjo u filmua nga NBC 6, dhe ishte e vështirë të thuash kush ishte më i emocionuar — vetë Avendaño apo doktori që e trajtoi, Dr. Zucker, i cili e quajti këtë procedurë “magjinë e tij personale”.
“Është ndjesia më e bukur. E kam bërë për shumë vite dhe, siç mund ta shihni, nuk mund të fsheh buzëqeshjen kur shoh reagimet e pacientëve dhe familjeve të tyre,” tha ai. “Sot në darkë ai do të ulet në tryezë dhe do të bëjë të gjitha ato gjëra që nuk ka mundur t’i bëjë më parë. Si mund ta përshkruash këtë me fjalë? Nuk ka fjalë që mjafton.”
Aktualisht në Shtetet e Bashkuara ka 79 qendra ku kjo procedurë ofrohet dhe mbulohet tërësisht nga Medicare./Katror.info
Përgatiti:
