Një trajner tenisi nga Britania e Madhe hapi zyrtarisht më 12 prill 2025 një fushë tenisi të përshtatshme për çdo mot në Podujevë në Kosovë, pas gati një dekade përpjekjesh për mbledhje fondesh.
David Bryceland, nga Altrincham, Manchester, vizitoi për herë të parë Kosovën në vitin 2016 si vullnetar në një kamp veror në Podujevë, ku u trondit nga mungesa e aktiviteteve sportive për fëmijët, raporton BBC, përcjell Katror.info.
Që atëherë, ai ka mbledhur mbi 20,000 £ përmes sfidave të ndryshme, përfshirë një maratonë tenisi 24-orëshe, përmes organizatës humanitare Manchester Aid to Kosovo (MAK). Këto fonde shërbyen për ndërtimin e fushës së parë të tenisit, të vendosur në Parkun e Paqes në Podujevë, të cilën Federata e Tenisit të Kosovës e ka cilësuar si projekt historik.
Bryceland, 35 vjeç, e përshkroi këtë nismë si një “punë me shumë dashuri” dhe tha se ndjeu nderin të realizonte shërbimin e parë në këtë “fushë për njerëzit”.
Organizata MAK e cilësoi hapjen e fushës si një “moment historik”, që do të sjellë gëzim në komunitet dhe do të përmirësojë mirëqenien fizike të banorëve. Ata vlerësuan kontributin e jashtëzakonshëm të Bryceland, duke e përshkruar atë si “katalizatorin” e një programi gjithëpërfshirës që synon të ofrojë mësime tenisi falas për fëmijët e zonës.
Inspirimi për përfshirjen e tij erdhi pas një takimi në Manchester me Saranda Bogujevcin, e mbijetuar e masakrës së familjes Bogujevci dhe tani deputete në Kosovë.
“Kur arrita në Podujevë, nuk mund ta besoja çfarë po shihja,” kujton ai. “Nuk kishte asnjë infrastrukturë për aktivitete të kohës së lirë. Ndërtesat ishin të shpuara nga plumbat. Ishte një përvojë vërtet tronditëse.” Në kampin veror kishte pak mundësi për sport, kështu që ai vendosi të prezantojë tenisin.
Që nga ajo kohë, ai është kthyer çdo vit në Kosovë me një grup vullnetarësh nga zona e Altrincham-it, duke mësuar fëmijët të luajnë tenis në ambiente të improvizuara – në parkingje, me litarë si rrjeta dhe kone për të shënuar fushat.
Në përpjekjet për ndërtimin e fushës është përfshirë edhe Alice Carroll, mike e znj. Bogujevci, e cila ka ndihmuar me dokumentacionin dhe procedurat burokratike për të siguruar lejen e ndërtimit. Ajo konfirmoi se po punojnë me Federatën e Tenisit të Kosovës për ndërtimin e më shumë fushave, ngritjen e një shtëpie-klubi dhe trajnimin e një trajneri të përhershëm.
“Do të donim të krijonim edhe një program binjakëzimi me klubet e tenisit në dhe përreth Altrincham-it,” tha ajo. “Kjo është vetëm fillimi – dhe shpresojmë që një ditë Wimbledon-i të mirëpresë lojtarin e parë nga Kosova.”
MAK shtoi: “Nga një fushë e zhveshur balte dhe ëndrrat e fëmijëve të zhvendosur nga lufta, Parku i Paqes është shndërruar në një oaz gëzimi”.
Jeton Hadërgjonaj, president i Federatës së Tenisit të Kosovës, tha se kjo fushë do të jetë një shtysë e fortë për shumë fëmijë dhe të rinj që të luajnë tenis, të argëtohen dhe të ndjekin ëndrrat e tyre sportive.
Ai shtoi se z. Bryceland, znj. Carroll dhe ekipi i përfshirë në ndihmën për ndërtimin e fushës në Podujevë “do të mbeten miqtë tanë përgjithmonë dhe do të jenë pjesë e historisë së tenisit në Kosovë”./Katror.info
Përgatiti:
