Ministri Italian i sportit Andrea Abodi ka deklaruar se vendi i tij do t’i vijë në ndihmë Kosovës në rast se do të jetë e nevojshme në pritjen e lojërave mesdhetare të vitit 2030, kjo për faktin se kërkohet një investim i madh në aspektin infrastrukturor.
Në vitin 2030 Kosova do të organizojë një ndër eventet më të mëdha sportive, Lojërat Mesdhetare, ku qindra sportistë do të garojnë me njëri-tjetrin për fitimin e medaljeve. Një kompeticion i tillë kërkon investime të mëdha, sidomos në aspektin infrastrukturor, por duket se për këtë gjë, ndihmën e ka ofruar ministri i sportit i Italisë, Andrea Abodi, diçka të cilën e ka konfirmuar në një intervista për Kosova Pres.
“Së pari, urojmë që të mund të lëmë një trashëgimi pozitive që të mund të jetë mbështetëse për ju miqtë kosovarë. Protokollet organizativë të Taranto 2026, në bashkëpunim me Organizmin Ndërkombëtar shpresoj që të jenë të nevojshme edhe për vendin tuaj. Pastaj, jemi gati për të dhënë çdo mbështetje nga këndvështrimi i bashkëpunimit, pikërisht për eksperiencat infrastrukturore që po ndërtojmë që edhe për Kosovën kjo të jetë një mundësi e zhvillimit të qëndrueshëm”, u shpreh Andrea Abodi, Ministri i Sportit i Italisë.
Mundesh me e lexu edhe…
Mbështetja nuk do të mohohet për askënd, madje as për Kosovën ka pohuar më tej Tommaso Foti, Ministri për Çështje Evropiane, PNRR dhe Politikat e Kohezionit.
“Ne nuk i kemi mohuar ndihmën askujt dhe nuk do t’ia mohojmë kurrë. Më duhet të them që sigurisht, kush merr angazhimin për të organizuar lojërat duhet të ketë edhe një kapacitet të vetin për të mund t’i bërë, sepse ndryshe bëhet e vështirë”,- Tommaso Foti, Ministri për Çështje Evropiane, PNRR dhe Politikat e Kohezionit.
Presidenti i Komitetit Organizativ të Lojërave Mesdhetare, i ka bërë thirrje qeverisë së Kosovës që të nisë menjëherë nga puna për ndërtimin e impianteve sportive.
“Sugjerimi im është të nisni që tani e të përfshini të gjitha institucionet për të evituar ndarjet e të ecim të gjithë në të njëjtin drejtim. Mund të filloni që tani ndërtimin e impianteve përndryshe me ndarje rrezikoni të vini vonë e të veproni sic po bëjmë ne me emergjencë, duke punuar ditë e natë për të përshpejtuar kohën”,- Massimo Ferrarese, President i Komitetit Organizativ të Lojërave Mesdhetare.
2 vite më parë Kosova fitoi të drejtën për organizimin e Lojërave Mesdhetare, të cilat kërkojnë një investim në infrastrukturën sportive rreth 250 milionë euro./Katror.info
Përgatiti:
