Me rastin e Ditës Ndërkombëtare të Tokës, organizata “Let’s Do It – Ta Pastrojmë Kosovën”, në bashkëpunim me Kolegjin Heimerer dhe Fondin Kosovar për Garanci Kreditore (FKGK), organizoi një aksion pastrimi në lagjen Veternik dhe përgjatë rrugës Shkupi në Prishtinë.
Në këtë aktivitet morën pjesë dhjetëra vullnetarë nga organizata, studentë të Kolegjit Heimerer dhe përfaqësues të FKGK-së, të cilët kontribuuan për të përmirësuar gjendjen e mjedisit urban dhe për të rritur ndërgjegjësimin qytetar mbi rëndësinë e mbrojtjes së ambientit.
Aksioni u zhvillua nën moton ndërkombëtare të këtij viti “Fuqia ime, planeti im”, duke theksuar lidhjen mes veprimit individual dhe shëndetit të planetit tonë. Organizatorët nënvizuan se qëllimi i aktivitetit ishte jo vetëm pastrimi fizik i hapësirave publike, por edhe edukimi dhe angazhimi i komunitetit në përpjekje të përbashkëta për një të ardhme më të qëndrueshme.
Mundesh me e lexu edhe…
Luan Hasanaj, nga organizata “Let’s Do It – Ta Pastrojmë Kosovën”, theksoi nevojën për veprime më të mëdha institucionale përballë ndotjes dhe mungesës së menaxhimit të mbeturinave.
“Ne kaq mund të bëjmë. Roli ynë është të mobilizohemi, por u takon institucioneve që të bëjnë zgjidhjen – për të përkrahur kompanitë që merren me pastrimin dhe për të hartuar politika që stimulojnë riciklimin”, tha Hasanaj.
Dita e Tokës, e cila shënohet çdo vit më 22 prill, është një ndër datat më të rëndësishme ndërkombëtare që mobilizon miliona njerëz në mbi 190 vende për të vepruar kundër ndotjes, ndryshimeve klimatike dhe shfrytëzimit të paqëndrueshëm të burimeve natyrore. Ajo përfaqëson një thirrje globale për përgjegjësi kolektive dhe individuale ndaj planetit që të gjithë e ndajmë./Katror.info
Përgatiti:
