Kryetari i Prishtinës, Përparim Rama, ia ka dhuruar Çelësin e Qytetit aktivistes së njohur serbe për të drejtat e njeriut, Natasha Kandiq.
Natasha Kandiq është një nga figurat më të njohura në fushën e aktivizmit për drejtësi dhe të drejtat e njeriut në Ballkan.
“Natasha Kandiq është një nga ato zëra të rrallë që nuk heshti, edhe kur bota zgjodhi të mbyllte sytë. Me guximin e saj të palëkundur, ajo i dha zë dhimbjes, i dha drejtësi kujtesës dhe nder viktimave pa dallim kombi apo gjuhe. Në kohët më të errëta, ajo zgjodhi të qëndrojë në anën e të vërtetës, duke rrezikuar gjithçka për një ideal më të madh: dinjitetin njerëzor. Sot, pata nderin t’i dorëzoj Çelësin e Qytetit të Prishtinës, një shenjë mirënjohjeje për jetën që ia kushtoi drejtësisë, të vërtetës dhe pajtimit. Puna dhe përkushtimi i saj na kujtojnë se pa e vërteta nuk ka paqe të qëndrueshme, as në Kosovë, as në rajon. Në një ditë që për ne është shumë më tepër se një datë në kalendar, Prishtina i thotë: faleminderit!,” ka shkruar Rama në Facebook.
Mundesh me e lexu edhe…
Ajo është themeluese e Fondit për të Drejtën Humanitare (Humanitarian Law Center – HLC), një organizatë joqeveritare me seli në Beograd, e cila që nga viti 1992 ka mbledhur dëshmi dhe fakte mbi shkeljet e të drejtave të njeriut gjatë luftërave në ish-Jugosllavi.
Gjatë gjithë luftës në Kosovë, ajo udhëtoi nëpër Serbi, duke ofruar informacione për shkeljet e të drejtave të njeriut që po kryheshin nga policia dhe ushtria serbe.
Ajo dhe stafi i saj u kërcënuan në mënyrë anonime për punën e tyre dhe zyra e tyre ishte lyer me një svastikë dhe mesazhin “spiunët e NATO-s”.
Provat që ajo mblodhi u përdorën më vonë në përgatitjen e aktakuzave nga Gjykata Penale Ndërkombëtare për ish-Jugosllavinë në Hagë.
Kandiq është fituese e më shumë se 20 çmimeve ndërkombëtare, rajonale dhe kombëtare për të drejtat e njeriut.
Aktivistja serbe për të drejtat e njeriut, Natasha Kandiq, deklaroi se Serbia, duke mos i ndjekur penalisht krimet e luftës po dëshmon se nuk është gati t’i dënojë përgjegjësit për krimet e kryera në Kosovë.
Në një intervistë për KosovaPress, ajo thotë se të dy shtetet duhet të kenë edhe një marrëveshje politike për të zgjidhur çështjen e personave të zhdukur.
Sipas Kandiqit, Serbia duhet ta kuptojë edhe faktin se anëtarësimi i Kosovës në organizata ndërkombëtare është në të mirë të serbëve të Kosovës./Katror.info
Përgatiti:
