Universiteti i Prishtinës ka hapur thirrjen për aplikime në edicionin e 24-të të Universitetit Ndërkombëtar Veror të Prishtinës (PISU), që do të mbahet nga data 7 deri më 18 korrik 2025.
Ky program synon të ofrojë një përvojë akademike dhe kulturore për studentë nga Kosova dhe vende të tjera të botës.
Në kuadër të PISU 2025 do të ofrohen gjithsej 16 kurse në fusha të ndryshme të studimit, të cilat do të ligjërohen nga profesorë ndërkombëtarë me përvojë.
Mundesh me e lexu edhe…
Përveç aspektit akademik, pjesëmarrësit do të kenë mundësi të marrin pjesë edhe në aktivitete jashtë-mësimore, përfshirë ekskursione dhe programe kulturore që synojnë të prezantojnë trashëgiminë dhe realitetin e Kosovës.
Programi është i hapur për studentë nga e gjithë bota, ndërsa pjesëmarrja është falas për studentët nga rajoni i Ballkanit. Për studentët ndërkombëtarë nga vende të tjera aplikohet një tarifë prej 100 eurosh, e cila përfshin akomodimin dhe ushqimin për kohëzgjatjen e programit.
Aplikimet janë të hapura deri më 30 maj 2025 dhe procesi zhvillohet në mënyrë elektronike përmes faqes zyrtare të Universitetit Ndërkombëtar Veror: https://unvp.uni-pr.edu.
Universiteti ka bërë të ditur se përzgjedhja e kandidatëve do të bazohet në kriteret akademike dhe motivimin e tyre për pjesëmarrje.
Për informata shtesë, studentët mund të kontaktojnë organizatorët përmes adresës elektronike: [email protected], si dhe të ndjekin njoftimet përmes faqes zyrtare në Facebook: https://www.facebook.com/prishtinasummeruniversity.
PISU mbetet një nga iniciativat më të rëndësishme ndërkombëtare të Universitetit të Prishtinës, duke ofruar platformë për shkëmbim akademik dhe ndërkulturor ndërmjet studentëve dhe profesorëve nga katër kontinente. /Katror.info
Përgatiti:
