Nga Londra, Parisi e Milano… tek Oswestry në Shropshire, ku tani mund të dalësh nga biblioteka me një veshje të re, falas!
Në një cep të qetë të Anglisë, një iniciativë unike po sjell jetë të re në bibliotekat lokale: një garderobë e përbashkët, ku njerëzit mund të huazojnë rroba njësoj siç marrin libra. Ideja vjen nga Lizzie Dibble, e cila shpreson që kjo mënyrë kreative të sjellë më shumë vizitorë në biblioteka dhe të promovojë modën e qëndrueshme, shkruan Positive News, përcjell Katror.info.
“Në bibliotekë nuk ka presion. Nuk është si të hysh në një butik ku ndihesh i huaj. Ka njerëz që më kanë thënë se as muzika nëpër dyqane nuk i bën të ndihen rehat. Ne duam që kjo hapësirë të jetë mikpritëse për të gjithë,” thotë Dibble.
Mundesh me e lexu edhe…
Ajo themeloi projektin With Love From… në vitin 2023 për të shkëmbyer rroba me miqtë dhe familjen. Me kohën, interesi u rrit, po ashtu edhe donacionet. Kështu, projekti u zgjerua duke ofruar punëtori qepjeje, diskutime mbi qëndrueshmërinë dhe shërbime riparimi.
Sot, garderoba e përbashkët ndodhet brenda bibliotekës së Oswestry-t dhe menaxhohet nga vullnetarë. Ajo financohet përmes një fushate online dhe një granti nga komuna. Rreth 400 artikuj veshjesh mund të huazohen për tre javë përmes një barkodi, njësoj si një libër. Çdo veshje ka etiketën e emrit të personit që e ka dhuruar – një mënyrë për t’i dhënë më shumë vlerë rrobave të përdorura.
Ndryshe nga aplikacionet që i japin me qira veshjet e luksit, kjo bibliotekë ofron një përvojë të ngrohtë, fizike, gjithëpërfshirëse dhe falas. With Love From… besohet të jetë e para që përfshin rroba në një bibliotekë tradicionale në Britani.
“Më pëlqen që mund të shfletoj pa u shqetësuar për çmimin, dhe gjej veshje që nuk do t’i zgjidhja kurrë në një dyqan apo aplikacion,” thotë Bhavini Mirza, një mësuese tekstili në trajnim. “Është ndryshe kur i sheh dhe i prek vetë.”
Dibble shton: “Kjo ide rrit respektin për rrobat.” Edhe nëse ndodh ndonjë njollë vere, askush nuk gjobitet. Rrobat që nuk mund të përdoren më, ruhen për punëtori, ku studentët i shndërrojnë në veshje të reja.
Ndërsa shumica e koleksionit është për gra, Dibble po punon për të përfshirë veshje pune për ata me të ardhura të ulëta, një përzgjedhje për maturantët dhe veshje për Ditën e Librit.
Ajo ëndërron që garderoba e përbashkët të shtrihet në të gjitha bibliotekat e Shropshire-it dhe më gjerë. “Nëse funksionon në Oswestry, mund të funksionojë kudo,” thotë ajo.
Për momentin, Dibble ndjehet e lumtur që po ndihmon rrobat të qëndrojnë në qarkullim: “Kur dikush merr diçka që ka qenë e jotja dhe thotë ‘E dua këtë!’, më ngjethen lekurat. Është një ndjesi e mrekullueshme.”/Katror.info
Përgatiti:
