Sonte nis edicioni i trembëdhjetë i Festivalit “FerFilm”, në të cilin do të shfaqen filma nga shumë vende të botës me rrëfime interesante.
Shkëndije Azemi, zëdhënëse e festivalit, theksoi se “këtë vit kanë aplikuar rreth 300 filma dhe prej tyre janë përzgjedhur 70, dhe janë prej shteteve të ndryshme, si nga Kroacia, Belgjika, Franca”.
Këta 70 filma do të shfaqen në dy orare dhe se interesimi është i kënaqshëm, tregoi ajo.
Mundesh me e lexu edhe…
Ajo në “Mirëmëngjesi Kosovë” në RTK tha se festivali do të zgjasë pesë ditë, kurse hapja do të bëhet sonte me filmin “Lejleku” nga regjisori Isa Qosja.
Po ashtu, bëri me dije se filmat do të jenë të metrazhit të shkurtër dhe do të ndahen në katër kategori: fiktiv, dokumentar, eksperimental dhe animacione.
“Këto do të shfaqen në tri kinema të improvizuara: në teatrin e qytetit të Ferizajt, në Galerinë e Arteve dhe në qytetin e Shtimes”, shtoi Azemi.
Festivali ka karakter edhe garues. Në natën finale do të bëhet edhe përzgjedhja e filmave dhe ndarja e çmimeve. Ajo tha se për secilën kategori do të ketë çmim, por do të jenë edhe dy çmime të tjera.
Ndër të tjera, ajo pohoi se ky festival ka edhe karakter turistik, pasi me mysafirë të shteteve të ndryshme do të vizitojnë qytete të Kosovës./RTK/Katror.info
