Për herë të parë në histori, Kosova do të përfaqësohet në Lojërat Botërore (World Games), që do të mbahen nga 7 deri më 17 gusht 2025 në Chengdu të Kinës. Nderin për ta përfaqësuar vendin e ka fituar sportisti i njohur i triatlonit, Albion Ymeri, i cili ka siguruar kualifikimin falë renditjes së tij të lartë botërore në disiplinën e duatlonit.
Ky është një moment historik për sportin kosovar, pasi Kosova debuton në këtë ngjarje madhore që mbledh sportistë nga e gjithë bota. Në edicionin e ardhshëm të Lojërave Botërore do të garohet në 34 sporte të ndryshme, me pjesëmarrjen e rreth 5,000 sportistëve nga 117 shtete të kualifikuara.
Lojërat Botërore organizohen çdo katër vjet nga Asociacioni Ndërkombëtar i Lojërave Botërore (IWGA) dhe shërbejnë si një platformë për promovimin dhe zhvillimin e disiplinave joolimpike, që nuk përfshihen në programin zyrtar të Lojërave Olimpike./Katror.info
