Komisionerja e Bashkimit Evropian për Zgjerim, Marta Kos, gjatë një diskutimi në mbledhjen e përbashkët të Komitetit për Punë të Jashtme dhe Komitetit pët Buxhet të Parlamentit Evropian, ka thënë se janë duke përcjellur ecurinë e normalizimit të marrëdhënieve Kosovë-Serbi para lëshimit të pagesave të para nga Plani i Rritjes.
“Të dyja palët duhet të angazhohen në mënyrë konstruktive, të bëjnë progres të matshëm, të arrijnë rezultate të prekshme. E pastaj do të vendosim për pagesën ose jo të fondeve. Nuk mund të komentoj për këtë para vendimit, por është një çështje shumë e rëndësishme sepse lidhet drejtpërdrejt edhe me kredibilitetin tonë”, ka thënë ajo.
Ajo gjithashtu ka theksuar ndikimin që ngërçi institucional në Kosovë ka mbi Planin e Rritjes, në vlerë totale prej 6 miliardë eurosh, përmes së cilit BE-ja synon përkrahjen financiare të gjashtë vendeve të rajonit të Ballkanit Perëndimor deri në vitin 2027.
Mundesh me e lexu edhe…
“Nuk ka lëvizje as në Kosovë, e cila ka tentuar për herë të 14-të të formojë qeverinë dhe ka dështuar. Gjithashtu, na parashtrohen pyetje nëse masat e BE-së ndaj Kosovës kanë të bëjnë me Planin e Rritjes – dhe përgjigjja është jo. Ato janë të ndara nga ky proces. Megjithatë, çështja e normalizimit duhet të merret parasysh”, ka shtuar Kos.
Ndryshe, qëllimi kryesor i kësaj pakete ambicioze financiare të BE-së është të ofrojë mbështetje për rritjen ekonomike në rajonit, përmes së cilës synon të nxisë avancimin e reformave në shtetet e Ballkanit Perëndimor para integrimit të tyre në BE./Albanian Post/Katror.info
