Flora dhe fauna e pasur e Kosovës u sollën në qendër të vëmendjes ndërkombëtare përmes ekspozitës së fotografit të njohur kosovar, Arian Mavriqi, e cila u hap më 12 maj 2025 në Universitetin e Bujqësisë dhe Shkencave të Jetës në Gödöllő, Hungari, shkruan Katror.info.
Te gjithë e njohim si njëri ndër promovuesit më të mëdhenj të jetës së egër të Kosovës në rajon dhe më gjerë, Mavriqi këtë herë prezantoi një koleksion të pasur fotografish që pasqyrojnë biodiversitetin unik të vendit tonë.
Ekspozita u realizua në bashkëpunim me profesorin Miklós Heltai, drejtor i Universitetit të Wildlife në Gödöllő dhe një bashkëpunëtor i Mavriqit në fushën e fotografisë së botës së egër. “Ideja për këtë ekspozitë lindi së bashku me profesorin Heltai. Nga ai kam mësuar shumë, pasi që ai është drejtor i Universitetit të Wildlife në Gödöllő”, u shpreh Mavriqi për Katror.info.
Ngjarja kulturore u prit me entuziazëm dhe interes të lartë, ku morën pjesë studentë dhe pedagogë nga mbi njëzet nacionalitete të ndryshme, të cilët studiojnë në këtë universitet prestigjioz hungarez. Sipas Mavriqit, ekspozita ka zgjuar kureshtjen dhe habinë e publikut, sidomos për speciet e rralla të prezantuara nga Kosova.
“Shumë prej të pranishmëve shprehën dëshirën ta vizitojnë Kosovën për t’i parë nga afër dhe për t’i fotografuar vetë këto specie,” tha më tej Mavriqi, duke theksuar potencialin që ka natyra e Kosovës për turizmin ekologjik dhe shkencor.
Në kuadër të kësaj vizite, Mavriqi ka realizuar gjithashtu xhirime dhe fotografi për një dokumentar të ri mbi jetën e egër në Hungari, i cili pritet të publikohet së shpejti në bashkëpunim me Ambasadën e Republikës së Kosovës në Budapest. Ky projekt do të shërbejë si një tjetër urë lidhëse mes dy vendeve dhe një hap drejt thellimit të bashkëpunimit ndër-institucional në fushën e mjedisit dhe kulturës.
“Një gjë tjetër shumë e rëndësishme është se gjatë qëndrimit tim në Hungari kam realizuar disa xhirime dhe pamje të veçanta për një dokumentar mbi jetën e egër në këtë vend. Ky dokumentar pritet të publikohet së shpejti, në bashkëpunim me Ambasadën e Kosovës në Hungari, duke vazhduar dhe thelluar edhe më tej bashkëpunimin me të njëjtin universitet”, u shpreh Mavriqi.
Gjithashtu, i pranishëm në ekspozitë ishte edhe Ambasadori i Kosovës në Hungari, z. Delfin Pllana, dhe në fjalën e tij vlerësoi punën e Mavriqit, duke e cilësuar ekspozitën si një dritare të hapur për Kosovën dhe pasuritë e saj natyrore.
Ngjarja u përcoll me një koktej të organizuar nga universiteti dhe komuniteti i studentëve kosovarë në Gödöllő, me mbështetjen e Ambasadës së Kosovës. Të ftuarit patën rastin të shijojnë verëra dhe ushqime tradicionale nga Kosova, duke i dhënë kësaj ekspozite një karakter të plotë kulturor dhe përfaqësues.
Ekspozita e Arian Mavriqit nuk është vetëm dëshmi e bukurive të natyrës së Kosovës, por edhe një mjet i fuqishëm i diplomacisë kulturore dhe mjedisore, që forcon lidhjet mes popujve përmes artit dhe dashurisë për natyrën./Katror.info.
