E përditësuar 4:30
Presidentja e Kosovës, Vjosa Osmani është deklaruar pas takimit që ka pasur me liderët e subjekteve politike rreth ngërçit politik.
Ajo tha se edhe pas 16 përpjekjeve nuk është konstituar Kuvendi.
Mundesh me e lexu edhe...
“Edhe sot i kam inkurajuar partitë politike të gjejnë zgjedhje të përbashkët. Ky është vetëm takimi i parë, nëse është e nevojshme do të takoj edhe liderët veç e veç, këto takime nuk janë për formimin e qeverisë, por për konstituimin e Kuvendit. Disa prej pasojave që po ballafaqohet vendi ynë si pasojë e moskonstituimit të Kuvendit është zvarritja e procesit të planit të zgjerimit të BE-së, pra po flasim për diku rreth 900 milionë euro do të ishte përfitimi sikur Kosova ta ratifikonte marrëveshjen me BE-në”, tha ajo.
Po ashtu, ajo tha se ka zvarritje edhe në proceset e anëtarësimit, e të tjera.
“Ekziston një disponim minimal, që do të rritet me kalimin e kohës”, ka potencuar presidentja.
Po ashtu, ajo tha se duhet të vazhdohet me përpjekjet për konstituimin e Kuvendit.
Presidentja deklaroi se do të vazhdojnë diskutimet dhe se dialogu politik është i nevojshëm.
E përditësuar 15:11.
Takimi i organizuar të enjten nga presidentja e Kosovës, Vjosa Osmani, me liderët e katër partive kryesore parlamentare – Albin Kurti (LVV), Memli Krasniqi (PDK), Lumir Abdixhiku (LDK) dhe Ramush Haradinaj (AAK) – nuk ka prodhuar ndonjë zgjidhje konkrete për tejkalimin e ngërçit politik që po e paralizon punën e Kuvendit, shkruan Katror.info.
Presidentja Osmani pritet të zhvillojë takime të mëtejshme me përfaqësues të komuniteteve pakicë, ndërsa kriza në Kuvend vazhdon për shkak të mungesës së një shumice parlamentare për zgjedhjen e kryetarit të tij.
Kryetari i LDK-së, Lumir Abdixhiku, pas takimit u shpreh se gjendja mbetet e pandryshuar dhe theksoi se nuk ka pasur asnjë iniciativë konkrete për zgjidhje nga Lëvizja Vetëvendosje. Ai propozoi formimin e një qeverie kalimtare të unitetit, ide që u prit pozitivisht nga partitë tjera, përveç LVV-së, e cila nuk dha qëndrim të qartë. Abdixhiku shtoi se LDK nuk është e gatshme të vazhdojë me seancat e përsëritura çdo 48 orë dhe kërkoi nga presidentja që të shqyrtojë mundësinë e adresimit të çështjes në Gjykatën Kushtetuese.
Ramush Haradinaj nga AAK konfirmoi qëndrimin e partisë së tij për të mbështetur një kandidat unifikues për kryetar të Kuvendit, duke përmendur emrat e Saranda Bogujevcit ose Shqipe Selimit si opsione të mundshme.
Ndërkaq, kryetari i PDK-së, Memli Krasniqi, e cilësoi takimin si një hap para, por theksoi se situata mbetet pa zgjidhje. Ai i bëri thirrje kryetarit të VV-së të propozojë një kandidat që mund të fitojë shumicën parlamentare dhe kërkoi nga presidentja që të shqyrtojë ndërhyrjen në Gjykatën Kushtetuese për të qartësuar rrugën për zgjidhje institucionale.
Liderët opozitarë theksuan se bllokada aktuale nuk është thjesht procedurale, por thellësisht politike, dhe se mungesa e shumicës efektive në Kuvend po mban peng procesin e formimit të institucioneve./Katror.info
E përditësua 13:09. – Nisin takimet e liderëve partiakë me Osmanin
Ka nisur takimi mes presidentes së vendit, Vjosa Osmani me liderët e partive politike pas dështimit për të disatën herë të konstituimit të Kuvendit të Kosovës.
Në këtë takim po marrin pjesë, kryetari i Lëvizjes Vetëvendosje, Albin Kurti, i PDK-së, Memli Krasniqi, LDK-së, Lumir Abdixhiku dhe ai i AAK-së, Ramush Haradinaj.
Ndryshe, Kosova ndodhet në ngërç institucional pas zgjedhjeve të fundit parlamentare të 9 shkurtit 2025. Pavarësisht 16 tentimeve për të konstituuar Kuvendin, procesi ka mbetur i bllokuar për shkak se partia që ka dalë e para në zgjedhje- Lëvizja Vetëvendosje nuk po arrin t’i sigurojë votat e mjaftueshme për zgjedhjen e kryeparlamentares, ndërsa partitë që gjatë legjislaturës së kaluar kanë qenë në opozitë nuk po pajtohen për ta votuar të propozuaren e kësaj partie, Albulena Haxhiun.
Takimet është paraparë të nisin në orën 13:00.
***
Sot takimi i Osmanit me liderët e partive
Sot në Presidencën e Kosovës pritet të zhvillohet një takim mes presidentes Vjosa Osmani dhe përfaqësuesve të subjekteve politike parlamentare.
Takimi konsultativ në Presidencë është parë si një hap drejt dialogut ndërpartiak, por mbetet të shihet nëse do të prodhojë rezultate konkrete për zhbllokimin e situatës aktuale politike.
Të gjitha partitë politike që janë ftuar për takim konsultues nga presidentja Vjosa Osmani e kanë konfirmuar pjesëmarrjen.
Kështu bëri të ditur këshilltari për media i Presidencës, Bekim Kupina.
“Të gjithë e kanë konfirmuar pjesëmarrjen në takimin e së enjtes me Presidenten Osmani”- ka thënë Kupina.
Takimi midis Osmanit dhe liderëve politik do të zhvillohet sot nga ora 13:00.
E dje Osmani ka paralajmëruar se takimi me liderët e partive është vetëm fillimi i një serie takimesh dhe diskutimesh lidhur me këtë çështje.
Ajo ka shtuar se nuk dëshiron të paragjykoj për rezultatet e këtij takimi por ka uruar që secili nga liderët do të angazhohet duke vënë si parësor interesin e Kosovës.
“Unë i falenderoj liderët e partive që i janë përgjigjur pozitivisht. Ky është vetëm fillimi i një serie takimesh. Ne do të vazhdojmë varësisht se si shkojnë diskutimet nesër, qoftë në atë format, qoftë në formate të ngjashme, qoftë në takime një nga një me liderët e partive. Si institucion i Presidencës jemi në zbatim të detyrave kushtetuese sepse siç e dini neni 84 përcakton që presidentja e vendit ka për detyrë të garantojë funksionimin kushtetues të institucioneve.”
“Moskonstituimi i Kuvendit të Kosovës e rrezikon pikërisht funksionimin kushtetues të institucioneve që është edhe arsyeja pse i kam ftuar liderët që të diskutojmë rrugën përpara. Nuk do të doja të paragjykoja tani për rezultatet por shpresoj që secili do të angazhohet duke vënë si parësor interesin e vendit dhe kur ndodh kjo rezultatet gjithmonë janë pozitive”, ka thënë Osmani gjatë konferencës për media, pas takimit me presidentin e Këshillit Evropian, Antonio Costa./EO
Përgatiti:
