Kohët e fundit, TikTok-u është kthyer në një lloj “zyre” jozyrtare të terapistit të internetit. Një moment sheh një video qesharake, dhe në tjetrin bindesh se ke ankth, autizëm, ADHD apo OCD – e tëra bazuar vetëm nga një video 30 sekondëshe, shkruan Katror.info.
Nësë akoma nuk jeni familjarizuar me këto terme, po ua jap një përshkrim të shkurtër se cka janë në të vërtetë:
ADHD është çrregullim neurozhvillimor që karakterizohet me vështirësi në përqendrim, hiperaktivitet dhe sjellje impulsive.
Mundesh me e lexu edhe…
Autizmi është çrregullim që përfshin vështirësi sociale, sjellje të përsëritura dhe ndjeshmëri ndaj stimujve të jashtëm.
OCD është gjendje mendore që karakterizohet nga mendime dhe dëshira të padëshiruara, pra obsesione, që çojnë në sjellje të përsëritura për të ulur ankthin që shkaktojnë obsesionet.
Shëndeti mendor është kompleks dhe marrja e diagnozës së duhur kërkon më shumë sesa të shikosh një video virale ose të lexosh një titull tërheqës që rrezikon ta kthejë shëndetin mendor në një trend.
Ndonjëherë këto video të bëjnë të ndihesh i kuptuar dhe mund të jenë hapi i parë drejt ndihmës së vërtetë. Por, TikTok-u nuk është mjek.
-TikToku të thotë se ke ADHD sepse shpesh harron ku e lë telefonin.
Por… ndoshta je thjesht… i lodhur.
-A është autizëm, ADHD, apo thjesht jeta moderne që na çmend?
Ti mund të thuash: “Jam shumë OCD sepse më pëlqen pastërtia dhe organizimi.” Por, nga një këndvështrim profesional, këto janë thjesht preferenca apo vlera personale.
Etiketimet e tilla mund të na japin njëfarë rehatie, por këtu qëndron problemi: kur i mbështesim tepër, rrezikojmë të fshehim atë që jemi vërtet.
Ekziston rreziku që algoritmi mund të çojë në keqinformim, gabim në diagnoza dhe individët mund të internalizojnë çrregullime që nuk i kanë në të vërtetë.
Platforma e shëndetit virtual ‘PlushCare’ analizoi së fundmi 500 video në TikTok që trajtonin çështje të shëndetit mendor, për të parë nëse përdoruesit e kësaj platforme po rrezikohen nga dezinformimi – dhe rezultoi se 84% e videove përmbanin informacione të pasakta ose të pavërteta.
Ndërsa 54% e videove përmbanin informacion të saktë, raporti tregoi gjithashtu se rreth 14.2% ishin aq keqinformuese sa mund të jenë potencialisht të dëmshme.
Një studim i publikuar në PLOS One zbuloi se vetëm 20% e krijuesve që flasin për ADHD kualifikimet e tyre profesionale, dhe asnjëri prej tyre nuk ishte profesionist i licencuar në fushën e mjekësisë.
Në studimin e Institutit të Autizmit Drexel, videot e lidhura me hashtagun #Autism kanë arritur një total prej 11.5 miliardë shikimesh, ku tregohet se 27% e videove u klasifikuan si të sakta, 41% si të pasakta dhe 32% si tepër të përgjithësuara.
Për OCD-në, një analizë e videove në TikTok ka treguar se 40% e videove nuk përdorën gjuhë të përqendruar te personi, psh “i varur” në vend të “person me çrregullim të varësisë”, 47% përmbanin komente stigmatizuese, dhe vetëm 30% tregonin një kuptim të vërtetë të gjendjes.
Prandaj, është mirë të jeni kurioz, por ju lutemi kontaktoni një profesionist. Terapistët, mjekët dhe këshilltarët janë trajnuar për të kuptuar nuancat e shëndetit mendor dhe mund të ofrojnë mbështetjen dhe udhëzimin që ju nevojitet vërtetë. Ata do t’ju ndihmojnë të kuptoni se çfarë po ndodh në të vërtetë. /Katror.info
