Dhoma e Tregtisë dhe Industrisë së Kosovës (DTHK) njofton se ka adresuar shqetësimet e saj para kryeministrit në detyrë dhe ministres në detyrë të Ekonomisë lidhur me vendimin e marrë nga Zyra e Rregullatorit të Energjisë (ZRRE) për liberalizimin e tregut të energjisë, shkruan Katror.info.
Sipas DTHK-së, nenet e Ligjit për Energjinë po shkelën me këtë vendim, i cili, sipas tyre, është duke ndikuar negativisht në bizneset vendore.
Në një takim të organizuar nga Sekretariati i Këshillit Kombëtar për Ekonomi dhe Investime, kryetari i Kuvendit të Dhomës, Hamdi Malushaj, theksoi se ZRRE-ja nuk ka kryer një analizë të mjaftueshme financiare për këtë proces, duke e konsideruar vendimin si të papërgjegjshëm ndaj interesave të bizneseve. Malushaj theksoi se ky vendim po i hedh bizneset në rrugë, duke i lënë në mëshirën e KEDS-it dhe duke rritur kostot e tyre.
Mundesh me e lexu edhe…
Ai bëri thirrje për krijimin e një komisioni qeveritar për auditimin e vendimit, duke propozuar që të analizohet me të njëjtin seriozitet siç po e analizon DTHK. Sipas tij, çmimi i ri i energjisë është dyfish më i shtrenjtë se ai mesatar në rajon dhe po rritet në 264%, duke dëmtuar bizneset dhe buxhetin e shtetit, me shifra dëmi që arrijnë në rreth 130 milionë euro për bizneset dhe 13 milionë euro për buxhetin.
Malushaj përfundoi duke vlerësuar se vendimi i ZRRE-së është i pa analizuar mirë dhe i ndikuar nga përfituesit e këtij vendimi, duke sugjeruar nevojën për rishqyrtim të këtij procesi për të shmangur dëmtimin e ekonomisë së vendit./Katror.info
