Organizata joqeveritare “EC Ma Ndryshe” e ka shënuar Ditën Botërore të Bletëve përmes aktiviteteve edukative dhe ndërgjegjësuese të zhvilluara me nxënës dhe fëmijë parashkollorë.
Në shkollën e mesme të ulët “Gani Saramati” në Prizren fillimisht është vendosur një hotel për insekte, ndërsa më pas është organizuar një vizitë edukative në një bletore për nxënësit e kësaj shkolle.
“Nxënësit janë njohur më nga afër me jetën e bletëve dhe rëndësinë e tyre për ruajtjen e ekosistemit”, thuhet në njoftim.
Mundesh me e lexu edhe...
Ndërkaq në kopshtin e fëmijëve “Cicërimat” në Prishtinë është mbajtur aktiviteti dedikuar parashkollorëve, ku përmes prezantimeve është theksuar rëndësia e bletëve për biodiversitetin dhe ekuilibrin mjedisor.
“Po ashtu, janë shpjeguar sfidat aktuale mjedisore dhe mënyrat e kujdesit ndaj natyrës. Aktiviteti është përmbyllur me vendosjen e një hoteli për insekte në oborrin e kopshtit, si një hap konkret drejt mbrojtjes së natyrës dhe promovimit të biodiversitetit”, thuhet në njoftim.
Sipas “EC Ma Ndryshe”, të dyja aktivitetet janë realizuar si fryt i bashkëpunimit dhe ideve të përbashkëta të lindura gjatë takimeve me përfaqësues të institucioneve arsimore.
“Përmes këtyre nismave, EC synon të rrisë ndërgjegjësimin për rëndësinë e mbrojtjes së mjedisit dhe biodiversitetit”, përfundon njoftimi. /Katror.info
Përgatiti:
