Fëmijët shpesh përfshihen në aktivitete dhe hobi të ndryshme gjatë rritjes – disa zgjasin për vite me radhë, ndërsa të tjera humbin interesin brenda pak ditësh. Por një studim i ri sjell dëshmi të forta se luajtja e një instrumenti muzikor në fëmijëri mund të ketë përfitime afatgjata për shëndetin e trurit, që zgjasin deri në moshën e tretë.
Çfarë tregon studimi?
Hulumtimi, i zhvilluar nga Universiteti i Edinburgut dhe Universiteti Edinburgh Napier, zbulon se individët që kanë praktikuar një instrument muzikor për pjesën më të madhe të jetës së tyre performojnë më mirë në testet e aftësive njohëse në moshën 70–80 vjeç, krahasuar me ata që nuk kanë luajtur kurrë.
Mundesh me e lexu edhe...
Ky përfitim vihet re edhe kur merren parasysh faktorë të tjerë si niveli i edukimit apo inteligjenca e hershme, gjë që sugjeron se muzika luan një rol unik në zhvillimin e funksioneve mendore.
Si u zhvillua studimi?
Pjesëmarrësit, të gjithë të lindur në vitin 1936 në zonat Edinburgh dhe Lothian, u testuan rregullisht për funksione njohëse dhe fizike gjatë jetës së tyre. Nga 420 të rritur të përfshirë në analizën e fundit, 167 kishin përvojë në luajtjen e një instrumenti muzikor, kryesisht gjatë fëmijërisë ose adoleshencës.
Të gjithë pjesëmarrësit shfaqën një rënie të ngjashme të aftësive njohëse me kalimin e viteve. Megjithatë, ata që kishin luajtur muzikë performuan dukshëm më mirë në testet e përpunimit të shpejtë të informacionit dhe arsyetimit vizual-hapësinor.
Çfarë është arsyetimi vizual-hapësinor?
Kjo aftësi i mundëson një personi të përfytyrojë objekte në mendje dhe të kuptojë pozicionin e tyre në hapësirë. Është një komponent thelbësor për aktivitete të përditshme si ecja në një dhomë me pengesa, ngarja e makinës apo edhe planifikimi i hapësirës.
A është muzika zgjidhja për trurin?
Studiuesit theksojnë se rezultatet janë premtuese, por nuk përbëjnë dëshmi përfundimtare se trajnimi muzikor është shkaku i përmirësimit njohës. Megjithatë, ata e konsiderojnë luajtjen e një instrumenti si një nga aktivitetet më premtuese për zhvillimin mendor afatgjatë./Katror.info
Përgatiti:
