Tri kompani nga sektori i Teknologjisë së Informacionit dhe Komunikimit (TIK) të Kosovës po prezantohen me dinjitet në njërin nga panairet më të mëdha teknologjike në Evropë, “GITEX Europe 2025”, i cili po mbahet nga 21 maji në kryeqytetin gjerman, Berlin, shkruan Katror.info.
Global CT Digital Kosovo, Brandfluence dhe Tenton janë kompanitë që po përfaqësojnë Kosovën në këtë platformë prestigjioze ndërkombëtare, duke ekspozuar produktet dhe shërbimet e tyre inovative para një audience të gjerë ndërkombëtare, përfshirë profesionistë të industrisë, korporata teknologjike, investitorë, përfaqësues institucionalë dhe aktorë të tjerë kyç të fushës së teknologjisë.
Pjesëmarrja e kompanive kosovare është bërë e mundur falë mbështetjes së Ministrisë së Industrisë, Ndërmarrësisë dhe Tregtisë (MINT), përmes Agjencisë për Investime dhe Përkrahjen e Ndërmarrjeve në Kosovë (KIESA).
Mundesh me e lexu edhe…
Stenda e Kosovës në panair po tërheq interes të madh, duke reflektuar një imazh gjithnjë e më pozitiv të vendit si një qendër në zhvillim për inovacion digjital, shërbime të outsourcing-ut dhe zgjidhje teknologjike të avancuara.
Pjesëmarrja në “GITEX Europe 2025” u ofron kompanive kosovare mundësi të rëndësishme për zgjerimin e rrjetit të tyre të bashkëpunimit, krijimin e partneriteteve strategjike dhe promovimin e zgjidhjeve të tyre në tregun global të teknologjisë./Katror.info
