Pranë ishullit grek të Alonissos në Egjeun lindor, zhytës vullnetarë mbledhin shishe plastike të kalbura, goma makinash dhe zinxhirë të ndryshkur spirancash nga shtrati i detit.
Më pas i vendosin në qese plehrash për ti larguar ato, si pjesë e një aksioni pastrimi të financuar nga BE-ja për të mbrojtur jetën detare. Sendet e nxjerra nga parajsa ishullore e Sporadeve, një vend i preferuar turistik për ujërat e tij të kaltra dhe parku detar më i madh i mbrojtur në Evropë, përfaqësojnë vetëm një pjesë të vogël të dhjetëra mijëra toneve mbetjesh që ndotin Detin Mesdhe çdo vit.
Parku, i krijuar pranë ishullit në fillim të viteve 1990, është shtëpia e një prej kolonive të fundit të fokave në botë dhe është një strehë për mbi 300 lloje peshqish, delfinësh dhe breshkash deti. Ekzistenca e tij i ka bërë vendasit dhe turistët gjithnjë e më të vetëdijshëm për rreziqet e ndotjes detare.
Mundesh me e lexu edhe...
Për të mbrojtur biodiversitetin bregdetar, Greqia ka premtuar të krijojë dy parqe të tjera detare në detet Egje dhe Jon, pjesë e 21 iniciativave me vlerë deri në 780 milionë euro.
Ajo ka miratuar ligjin për të zgjeruar zonat e mbrojtura detare në 30% të ujërave të saj territoriale deri në vitin 2030 dhe i ka paraqitur BE-së plane që përcaktojnë se si do të organizojë peshkimin, turizmin dhe energjinë në det të hapur.
Vetëm vitin e kaluar, në Greqi, nga disa dhjetëra organizata joqeveritare dhe vullnetarë që zbatuan projekte të mëdha pastrimi u nxorën dhe u larguan më shumë se 100,000 tonë mbetje plastike dhe mbeturina të tjera nga deti në disa zona bregdetare të saj në detin Egje dhe detin Jon. /Katror.info
Përgatiti:
