Në Shërbimin Spitalor dhe Klinik Universitar të Kosovës (ShSKUK), për herë të parë ka nisur të aplikohet trajtimi inovativ me Elektrostimulim të Nervit Vagus (VNS) për pacientët që vuajnë nga epilepsia farmakorezistente – një hap i madh drejt modernizimit të shërbimeve neurologjike në vend.
Më 2 dhe 3 qershor 2025, janë trajtuar me sukses tre pacientët e parë që kishin përmbushur kriteret për këtë ndërhyrje, të përzgjedhur nga ekipi multidisiplinar i Klinikës së Neurologjisë. Ndërhyrjet kirurgjike janë realizuar në sallat e operacionit të Klinikës së Neurokirurgjisë, nën udhëheqjen e neurokirurgut të njohur italian Dr. Leonardo Fiori (nga spitali “Alessandro Manzoni” në Lecco), në bashkëpunim me ekipin e neurokirurgëve vendorë të udhëhequr nga Dr. Besnik Elshani, si dhe me mbështetjen e ekipeve të anestezionit dhe neurologjisë.
Kjo metodë bashkëkohore aplikohet tek pacientët të cilët, pavarësisht përdorimit të disa medikamenteve antiepileptike, vazhdojnë të përjetojnë kriza epileptike të shpeshta dhe të rënda. Ajo përfshin implantimin e një pajisjeje që dërgon impulse elektrike në nervin Vagus, duke ndihmuar në uljen dhe kontrollimin e krizave epileptike.
Realizimi i këtij shërbimi është rezultat i një përgatitjeje shumëdimensional që ka filluar që nga viti 2022, nën udhëheqjen e Klinikës së Neurologjisë. Përgatitjet përfshijnë trajnime profesionale të stafit brenda dhe jashtë vendit, si dhe hartimin e dokumentacionit dhe planit të veprimit nga Grupi Punues i Ministrisë së Shëndetësisë./Katror.info
