Ministria e Kulturës, Rinisë dhe Sportit (MKRS) ka mbajtur një takim informues për të gjithë të interesuarit që dëshirojnë të aplikojnë për fonde nga Bashkimi Evropian përmes projekteve të ndryshme zhvillimore dhe kulturore.
Gjatë këtij sesioni, u theksua se, ndonëse Kosova nuk është shtet anëtar i BE-së, ajo ka të drejtë të marrë pjesë në 17 nga gjithsej 40 programe evropiane, çka përfaqëson një mundësi të rëndësishme për organizatat dhe individët që synojnë të përfitojnë nga fondet ndërkombëtare.
Florim Canolli, udhëheqës i Zyrës së Koordinatorit Kombëtar për IPA, sqaroi se masat e vendosura nga BE-ja ndaj Kosovës nuk prekin këto programe. “Programet e BE-së nuk janë të ndikuara nga masat e BE-së. Ato janë të dedikuara për aplikantët që aplikojnë direkt në BE dhe jo përmes Qeverisë së Kosovës, për dallim nga fondet IPA,” tha Canolli.
Mundesh me e lexu edhe…
Ndërkohë, Edouard Mayoral nga Instituti Francez theksoi rëndësinë e bashkëpunimit mes institucioneve evropiane dhe atyre kosovare. “Është e rëndësishme të ndajmë lajmet dhe të përçojmë mesazhin se Kosova është pjesë e Evropës. BE-ja është këtu për të bashkëpunuar me Kosovën në të gjitha fushat e mundshme,” u shpreh ai.
Nita Llonçari nga Zyra e Koordinatorit Kombëtar (NIPAC), tregoi se Kosova tashmë merr pjesë në 9 nga 17 programet për të cilat ka të drejtë, përfshirë: Qytetaria dhe Barazia, Të Drejtat dhe Barazia, Horizont Evropa, Evropa Kreative, Erasmus+, Tregu i Vetëm, Evropa Digjitale, Dogana dhe Drejtësia.
Pjesëmarrësit në takim theksuan se këto programe janë një mundësi e madhe për organizatat vendore që të zhvillojnë projekte me ndikim në komunitet, duke përfituar fonde dhe përvojë nga partneritetet evropiane./RTK Live/Katror.info
