Kurban Bajrami është festë tradicionale fetare në botën Islame. Është një ditë e veçantë që sjell me vete mesazhe për sakrificë, përkushtim, falje dhe solidaritet shoqëror. Në çdo shtëpi, në çdo komunitet, kjo festë nuk është vetëm simbol i therjes së kurbanit, por mbi të gjitha një kujtesë se në jetë ka vlera që e kalojnë materialen – dashuria për njëri-tjetrin, ndihmesa për më të dobëtit dhe respekti për besimin e secilit.
Origjina e Kurban Bajramit lidhet me historinë e profetit Ibrahim, i cili, në shenjë bindjeje dhe devotshmërie ndaj Zotit, pranoi të sakrifikojë të birin. Por Zoti, në një akt mëshire dhe mirësie, e zëvendësoi atë me një dash, që sipas muslimanëve kjo nënkupton se vullneti për të dhënë më të mirën prej vetes kthehet në marrje më të mirë, në këtë rast mëshirë dhe bekim nga Zoti. Andaj, kjo ngjarje është një simbolikë e fuqishme për sakrificën dhe sinqeritetin në besim dhe në jetë.
Por ajo çka e bën këtë festë edhe më të bukur është mesazhi i solidaritetit njerëzor. Mishi i kurbanit nuk mbahet vetëm për familjen, por ndahet me të afërmit, fqinjët dhe më të varfrit. Kjo e kthen këtë akt fetar në një akt shoqëror dhe human, duke i dhënë rëndësi asaj që na bën të gjithëve më njerëzorë: kujdesi për të tjerët.
Në Kosovë dhe kudo në botën myslimane, Kurban Bajrami është një mundësi për të vizituar të afërmit, për të rregulluar marrëdhënie, për të kërkuar falje dhe për të mbjellë paqe në çdo zemër. Është dita kur dyert e shtëpive hapen, tavolinat mbushen dhe buzëqeshjet bëhen më të sinqerta. Fëmijët gëzojnë, të moshuarit respektohen dhe çdo shpirt përjeton një çast reflektimi.
Mundesh me e lexu edhe…
Nga Katror Media, Gëzuar Kurban Bajramin të gjithëve! Le të sjellë kjo festë më shumë mirësi, paqe dhe dashuri në çdo shtëpi dhe në çdo zemër. /Katror.info
Përgatiti:
