Biblioteka e qytetit të Prishtinës ka marrë një pamje të re dhe plot jetë me rifunksionalizimin e hapësirës së degës së saj në Ulpianë. Në një atmosferë të mbushur me entuziazëm dhe zëra fëmijësh, u përurua ambienti i rinovuar që tanimë është kthyer në një qendër të dashur për komunitetin.
Siç bëri të ditur drejtoresha Sibel Halimi përmes një postimi në rrjete sociale, hapësira tashmë ofron kushte më të mira për qasje në dije dhe kulturë. Ajo shtoi se fëmijët “pushtuan me gëzim” ambientin, duke dëshmuar edhe një herë rëndësinë e këtij institucioni për të gjitha moshat.
Gjithashtu, me rastin e Ditës së Çlirimit të Prishtinës, më 11 qershor, qytetarët do të kenë mundësinë të bëhen anëtarë të bibliotekave pa pagesë.
Mundesh me e lexu edhe…
Biblioteka “Hivzi Sulejmani”, pjesë e rrjetit të Bibliotekës së qytetit të Prishtinës, mbetet një institucion i rëndësishëm kulturor, edukues dhe informues. Ajo grumbullon, pasuron, përpunon dhe jep në huazim koleksione nga fusha të ndryshme të krijimtarisë dhe veprimtarisë intelektuale.
Kjo iniciativë është një hap i rëndësishëm drejt afrimit të brezave të rinj me librin, dijen dhe kulturën, duke i kthyer bibliotekat në hapësira të gjalla dhe të nevojshme për komunitetin./Katror.info
