Ministria e Ekonomisë ka reaguar përmes një komunikate zyrtare lidhur me procesin e ankandit për ndërtimin e parkut solar me kapacitet 100 MW, pas disa raportimeve mediatike që, sipas saj, kanë përhapur dezinformata dhe insinuata të pabazuara për shkelje apo favorizim.
Sipas Ministrisë, ankandi është zhvilluar në mënyrë tërësisht transparente dhe konkurruese, me mbështetjen e Qeverisë së SHBA-së përmes USAID. Fituesi i ankandit është shpallur konsorciumi Orllati-Holdigaz-ZPV-Jaha Solar, me përfaqësim nga Zvicra, Gjermania dhe Kosova. Ata ofruan çmimin më të ulët – 48.88 €/MWh – shumë më konkurrues krahasuar me çmimin prej 161.6 €/MWh të energjisë së blerë më parë përmes skemave të tarifave të garantuara.
Garancioni bankar dhe kërkesat standarde
Mundesh me e lexu edhe...
Ministria sqaron se ka kërkuar garancion bankar prej 7.5 milionë euro nga fituesi për të garantuar realizimin e projektit. Gjithashtu, për shkak të bilancit financiar të dobët të KOSTT në kohën e ankandit, është kërkuar edhe një garanci për pagesën e energjisë së prodhuar – praktikë që Ministria e konsideron standard ndërkombëtar dhe jo shkelje.
Proces transparent dhe i monitoruar
Sipas komunikatës, ankandi është promovuar gjerësisht në nivel vendor dhe ndërkombëtar, dhe ka tërhequr aplikime nga 6 kompani dhe konsorciume nga 6 shtete. Gara përfundoi me katër raunde konkurrimi elektronik, të transmetuara drejtpërdrejt në RTK dhe në faqen zyrtare të Ministrisë, duke garantuar transparencë maksimale.
Asnjë garancion shtetëror
Ministria thekson se nuk është lëshuar asnjë garancion nga institucionet shtetërore, përveç një zotimi politik për të ndihmuar në sigurimin e garancisë për KOSTT në rast nevoje.
Ndikimi në tarifat e konsumatorëve
Kostoja e mundshme për sigurimin e garancisë nga bankat, sipas Ministrisë, do të kishte ndikim minimal në tarifat e konsumatorëve – rreth 0.0002%, që për një faturë mujore prej 5,000 euro do të nënkuptonte vetëm 1 cent shtesë.
Një hap drejt reputacionit ndërkombëtar
Ministria përmbyll komunikatën duke theksuar se ky ankand ka krijuar reputacion pozitiv për Kosovën, duke u përmendur si shembull suksesi nga Asociacioni i Rregullatorëve të Energjisë (ERRA). Ajo rikonfirmon përkushtimin për transparencë dhe informim të drejtë publik në të gjitha proceset e ngjashme në të ardhmen./RTK/Katror.info
