Guvernatori i Bankës Qendrore të Kosovës (BQK), Ahmet Ismaili, së bashku me zëvendësguvernatoren Nesrin Shileku-Shala dhe stafin drejtues, ka zhvilluar një takim të rëndësishëm me përfaqësuesit e Fondit Monetar Ndërkombëtar (FMN), të udhëhequr nga shefi i misionit, Arkadiusz Majewski.
Takimi u realizua në kuadër të asistencës teknike të FMN-së për rishikimin dhe zbatimin e Kodit të Transparencës për Bankat Qendrore, një standard ndërkombëtar që synon përmirësimin e qeverisjes dhe rritjen e besimit publik në institucionet financiare.
Gjatë takimit, guvernatori Ismaili shprehu mirënjohjen për mbështetjen e vazhdueshme të FMN-së dhe theksoi rëndësinë e rritjes së transparencës dhe forcimit të qeverisjes së mirë si pjesë e angazhimit të BQK-së për t’iu përmbajtur standardeve ndërkombëtare.
Mundesh me e lexu edhe...
Në fokus të këtij projekti është shqyrtimi i praktikave të BQK-së në fushat e komunikimit dhe marrëdhënieve me institucionet, sektorin financiar dhe publikun, me qëllim përmirësimin e efektivitetit dhe llogaridhënies institucionale.
Sipas njoftimit zyrtar të BQK-së, ky projekt është pjesë e një serie iniciativash të ngjashme të realizuara në rajon, përfshirë Malin e Zi dhe Maqedoninë e Veriut, dhe dëshmon përkushtimin e institucioneve për avancimin e transparencës dhe ndërtimin e besimit publik.
“Qëllimi është të forcohet angazhimi me palët e interesit, të rritet efektiviteti i politikave monetare dhe financiare, dhe të promovohet llogaridhënia”, thuhet në njoftimin e BQK-së.
Pjesëmarrja e BQK-së në këtë projekt reflekton përkushtimin e saj për zhvillim të qëndrueshëm institucional dhe përputhshmëri me praktikat më të mira ndërkombëtare, në përputhje me Planin Strategjik të institucionit./Katror.info
