Kur flasim për stil, “Made in Italy” është shumë më tepër sesa një etiketë – është një filozofi që mishëron mjeshtëri të jashtëzakonshme, cilësi të lartë dhe dizajn të sofistikuar. Stili i meshkujve italianë është menjëherë i dallueshëm, por çfarë e bën kaq unik? Cilat janë ato elemente të vogla që e çojnë një pamje përtej zakonshmes?
Ky ishte pikërisht edhe qëllimi i fotografit Scott Schuman, kur krijoi blogun The Sartorialist në vitin 2005 – të dokumentonte mënyrën se si visheshin burrat në qytetet italiane për të kuptuar sekretet e stilit të tyre.
Edhe pas gjithë këtyre viteve, burrat italianë vazhdojnë të spikasin, falë një përzierjeje të shkëlqyer të shijes, cilësisë dhe vetëbesimit. Më poshtë do të gjeni disa këshilla për t’i sjellë vetes një dozë “sprezzatura” – atë elegancë të pakujdesshme që italianët e zotërojnë me aq lehtësi.
Mundesh me e lexu edhe...
1. Investoni në një xhaketë klasike
Në vend që të ndjekni çdo trend të ri, investoni në veshje të përjetshme. Një blazer blu me prerje të rregullt, me kopsat prej ari dhe të punuar nga leshi apo liri i lehtë, është një zgjedhje e sigurt. Nëse porositet te një rrobaqepës i mirë dhe qepet sipas përmasave tuaja, ajo xhaketë mund të vishet për jetë. Veshja me stil fillon me cilësi dhe përshtatje të përsosur.
2.Eksploroni nuancat e ndryshme të së kaltrës
Stili tonal – veshja me nuanca të ndryshme të së njëjtës ngjyrë – është një teknikë e preferuar nga italianët. Bluja është e gjithanshme, por kujdes me kombinimet: mos e përplasni blazerin e kaltër me pantallona në të kaltër tjetër, përndryshe rrezikoni të dukeni të çrregullt. Nëse veshja fillon nga pantallonat e kaltër, kombinojeni me një xhaketë bezhë ose një “Sahara Jacket” në ngjyrë të çelët për një efekt veror dhe të freskët.
3. Neutralet: minimalizëm me shumë stil
Stili “stealth wealth” ka rikthyer në modë tonet neutrale, por italianët i qasen me më shumë krijimtari. Nuk është fjala për veshje të ngushta apo të mërzitshme, por për ngjyra që reflektojnë dritën dhe ofrojnë freski – veçanërisht gjatë verës. Pantallonat e bardha, një xhaketë liri dhe këmisha me strukturë të lehtë janë zgjedhje ideale. Çdo detaj – nga kapelet tek këpucët dyngjyrëshe – është menduar me kujdes.
4.Stili i përditshëm: Rehat dhe modern
Sprezzatura, arti për të dukur i veshur bukur pa shumë përpjekje, është thelbi i stilit italian. Kostumet italiane janë më të buta, pa shtresa të panevojshme, me supe më natyrale dhe prerje më të lirshme. Veshjet formale mund të jenë të qeta, të lehta dhe shumë të përshtatshme për përditshmëri – mjafton të shtoni një palë espadrile apo mokasina kadifeje për një prekje elegante por të relaksuar.
5. Fuqia e detajeve
Aksesorët janë çelësi për të kaluar nga një pamje e zakonshme në një stil të sofistikuar. Një orë cilësore, një unazë diskrete apo një byzylyk vintage janë më se të mjaftueshme. Për më shumë teksturë dhe thellësi, mund të shtoni edhe një çantë apo të eksperimentoni me kontrastin e ngjyrave. Gjithçka është në masë dhe balancë – një parim thelbësor i stilit italian.
6. Kravatat dhe shallët: elegancë me finesë
Siç thotë Fabio Attanasio, për të thyer rregullat e stilit duhet t’i njohësh ato më parë. Kravatat prej twill janë më formale, ndërsa kravatat trikotazhi dhe shallët prej mëndafshi ofrojnë më shumë fleksibilitet dhe personalitet. Kujdesuni që nyja të jetë e formës së orës së rërës dhe që gjatësia të arrijë në nivelin e brezit. Një shall me motive apo ngjyra të gjalla mund të zëvendësojë me lehtësi kravatën dhe t’i japë xhaketës klasike një prekje të freskët.
Të vishesh si një italian nuk do të thotë të kopjosh verbërisht. Është një qasje që kombinon cilësinë, vetëbesimin dhe dashurinë për detajin. Kudo që të jetoni, gjithmonë mund të mësoni diçka nga populli që e ka kthyer stilin në mënyrë jetese. /Katror.info
Përgatiti:
