Si u bë ‘Labubu’ një fenomen global?

Qoftë se i shihni si të ëmbla, të shëmtuara apo thjesht të pazakonta, gjasat janë që keni dëgjuar për kukullat që janë kthyer në një sensacion global – Labubu.

I lindur si një “përbindësh”, ky krijesë si elf nga kompania kineze e lodrave Pop Mart është kthyer në një blerje virale.

Nuk mungojnë as yjet që e promovojnë: Rihanna, Dua Lipa, Kim Kardashian dhe Lisa nga Blackpink janë të gjitha në listë. Por edhe njerëzit e zakonshëm janë po aq të fiksuar – nga Shanghai në Londër, radhët e gjata për të kapur një Labubu kanë bërë bujë, madje edhe përplasje në dyqane.

“Ndjen një lloj triumfi kur arrin ta kapësh përmes gjithë asaj gare,” thotë fansja e zjarrtë Fiona Zhang, shkruan BBC, përcjell Katror.info.

Kjo dashuri globale për Labubu ka pothuajse trefishuar fitimet e Pop Mart gjatë vitit të kaluar – dhe sipas disa analistëve, ka ndihmuar edhe në ringjalljen e ndikimit kulturor të Kinës, të lëkundur pas pandemisë dhe marrëdhënieve të tensionuara me Perëndimin.

Çka është saktësisht Labubu?

Edhe ata që e njohin nuk janë të sigurt se mund ta shpjegojnë. Labubu është një personazh imagjinar dhe një markë. Fjala “Labubu” nuk ka kuptim të drejtpërdrejtë – është emri i një krijese nga seria e lodrave “The Monsters” e krijuar nga artisti Kasing Lung nga Hong Kongu.

Kukullat kanë fytyra vinili, trupa prej pelushi dhe një pamje karakteristike: veshë të theksuar, sy të mëdhenj dhe një buzëqeshje e ngathët me nëntë dhëmbë. Disa i shohin si të adhurueshëm, të tjerë si të çuditshëm – interneti është i ndarë.

Sipas Pop Mart, Labubu është “zemërmirë dhe gjithmonë do të ndihmojë, por shpesh e bën të kundërtën pa dashje”.

Në universin e Labubu-së ka edhe personazhe të tjerë si Zimomo, Tycoco dhe Mokoko, që gjithashtu kanë fituar popullaritet me kukullat e tyre.

Kush i shet Labubu?

Pop Mart nisi në 2010 si një dyqan lodrash të përziera në Pekin. Në 2016, kompania lansoi suksesin e saj të parë me kukullat Molly. Por ishte bashkëpunimi me Kasing Lung dhe dalja e Labubu në 2019 që e shpërtheu suksesin. Deri më 2020, Pop Mart hyri në bursën e Hong Kongut dhe aksionet e saj u rritën mbi 500% në vetëm një vit.

Sot, Pop Mart ka mbi 2,000 makina shitëse (roboshop) në mbarë botën dhe shet në më shumë se 30 vende, përfshirë SHBA, MB, Australinë dhe Singaporin. Gati 40% e të ardhurave të saj në 2024 erdhën nga jashtë Kinës. Kërkesa ka qenë aq e madhe, saqë zyrtarët doganorë në Kinë sekuestruan mbi 70,000 kopje të falsifikuara së fundmi.

Si u bë Labubu një fenomen global?

Fillimisht, Labubu ishte i famshëm vetëm në Kinë. Por, pas pandemisë, njerëzit kërkonin një mënyrë për t’u shkëputur emocionalisht dhe karakteri i “rremujshëm, por simpatik” i Labubu-së përfaqësonte një lloj anti-perfeksionizmi që rezonoi me shumë njerëz.

Popullariteti u përhap fillimisht në Azinë Juglindore, më pas në Kanada, ku Fiona dëgjoi për të nga miqtë filipinas. “Sa më shumë që bëhet popullor, aq më shumë e dua,” thotë ajo.

Për më tepër, çmimi i përballueshëm ndihmoi – shumica e kukullave kushtojnë 25–70 dollarë kanadezë, çmim që shumë e krahasojnë me një aksesore mode.

Në prill 2024, Lisa nga Blackpink postoi foto me Labubu në Instagram – dhe më pas erdhën Rihanna, Kim Kardashian dhe David Beckham, duke e kthyer fenomenin në global.

Pse janë aq të dëshirueshëm?

Askush nuk e di me siguri. Si shumica e trendeve virale, është një kombinim i rastësisë, kohës së duhur dhe dizajnit të pazakontë.

Shteti kinez është i kënaqur me suksesin. Agjencia Xinhua e quan Labubu një shembull të “kreativitetit, cilësisë dhe kulturës kineze në një gjuhë që e kupton bota”, ndërsa analistët vërejnë se suksesi i kompanive si Pop Mart, BYD apo DeepSeek tregon se “janë thjesht shumë të mira për t’u injoruar – pa marrë parasysh prejardhjen e tyre“.

Sakaq, miliona video në rrjetet sociale tregojnë njerëz që çelin me padurim kutitë “blind box” për të zbuluar se cilën kukull morën – veçanërisht versionet e rralla “chaser”, që janë më të vështira për t’u gjetur./Katror.info