Korporata Energjetike e Kosovës (KEK sh.a.) ka njoftuar sot se njësia A5 e Termocentralit Kosova A është kthyer sërish në operim, pas përfundimit të një sërë ndërhyrjesh dhe punimeve mirëmbajtëse. Sipas njoftimit zyrtar, njësia është sinkronizuar me rrjetin elektroenergjetik rreth orës 10:03 të mëngjesit, shkruan Katror.info.
KEK bën të ditur se punimet teknike ishin të domosdoshme për garantimin e funksionimit të sigurt dhe efikas të njësisë. Ndërhyrjet përfshinë sanimin e rrjedhjeve në ritejnxehëse dhe në ekonomajzer, pastrimin e ftohësve të hidrogjenit dhe komorave të kondenzatorit, si dhe punime të tjera mirëmbajtëse për siguri të shtuar operacionale.
Kryeshefi Ekzekutiv i KEK-ut, Gramos Hashani, ka falënderuar ekipet teknike për përkushtimin dhe angazhimin e treguar edhe gjatë ditëve të pushimit. “Ky rikthim në operim konfirmon edhe një herë përgjegjësinë dhe profesionalizmin e punonjësve tanë”, ka deklaruar ai.
Mundesh me e lexu edhe…
KEK gjithashtu ka adresuar shqetësimet e mundshme të banorëve që jetojnë pranë termocentralit, duke sqaruar se rritja e përkohshme e emetimeve në fazën fillestare të startimit është një dukuri e zakonshme në këtë lloj procesi teknik, që nuk paraqet rrezik për mjedisin. Kompania thekson se tymi i emetuar gjatë startimit ka qenë i përkohshëm dhe është zhdukur rreth orës 11:07, duke dëshmuar stabilizimin e njësisë.
KEK ka përsëritur përkushtimin e saj për menaxhim të përgjegjshëm të kapaciteteve prodhuese dhe furnizim të qëndrueshëm me energji elektrike për vendin, përmes planifikimit teknik dhe angazhimit të vazhdueshëm profesional./Katror.info
