Një nga mbrëmjet më të veçanta të Rame Lahaj International Opera Festival (RILOF), “Opera Night”, rikthehet më 28 korrik me një protagoniste të veçantë: sopranon e njohur ndërkombëtarisht, Marigona Qerkezi, shkruan Katror.info.
E cilësuar si një nga zërat më të spikatur të gjeneratës së re dhe ambasadore e denjë e kulturës shqiptare në skenat botërore, Marigona do të udhëheqë këtë natë të mbushur me emocione dhe art të lartë. E vlerësuar për zërin e saj dramatik, interpretimet emocionale dhe prezencën skenike të fuqishme, ajo ka performuar në disa prej teatrove më prestigjioze evropiane, si: Teatro Regio di Parma, Deutsche Oper am Rhein, Royal Danish Opera, Opera de Oviedo, dhe Teatro Comunale Bologna.
Në “Opera Night”, ajo do të interpretojë një repertor të larmishëm që përfshin kryevepra nga Bellini, Verdi, Puccini, vepra të kompozitorëve shqiptarë dhe tingujt e veçantë të Bernstein dhe Gershwin, nën shoqërimin në piano të mjeshtrit Jess Rucinski.
Mundesh me e lexu edhe...
Ngjarja do të mbahet më 28 korrik 2025, nga ora 20:30, në hapësirën e jashtme pranë Bibliotekës Kombëtare në Prishtinë.
Organizatorët ftojnë publikun të bëhet pjesë e kësaj mbrëmjeje që premton përjetime të rralla artistike dhe emocionale./Katror.info
