Orkestra Harkore e Operës së Kosovës do të sjellë sonte një mbrëmje të pasur muzikore për publikun me koncertin “Kosova në tinguj”, që do të mbahet në Pallatin e Rinisë në Prishtinë, duke filluar nga ora 18:00. Koncerti do të jetë nën dirigjimin e Edon Ramadanit dhe do të prezantojë vepra të njohura të kompozitorëve shqiptarë.
Soprano të njohura si Adelina Paloja, Kaltrina Miftari dhe Zana Abazi – Ramadani do të interpretojnë disa nga veprat më të dashura të repertorit shqiptar, përfshirë “Valsi i Lumturisë”, “Baresha” dhe “E kujtoj atë takim”.
Ushtruesi i detyrës së drejtorit të Operës së Kosovës, Meriton Ferizi, në një intervistë për RTK-në tha se publiku do të ketë mundësinë të dëgjojë një program të larmishëm që përfshin vepra që “tingëllojnë shumë bukur” dhe që “s’janë harruar deri sot prej kur janë krijuar”.
Mundesh me e lexu edhe...
Për këtë koncert, veprat janë përshtatur për një formacion më të vogël orkestral nga kompozitorët Valton Beqiri dhe Edon Ramadani, duke sjellë një përjetim të freskët të melodive tradicionale dhe atyre moderne shqiptare.
Ky koncert shënon një tjetër hap në promovimin e trashëgimisë muzikore shqiptare dhe fuqizimin e skenës operistike në vend./Katror.info
