Prej mesit të korrikut Kosova ndryshon. Ja nisin festivalet e mëdha, diaspora pushton rrugët dhe rrugicat, gjysa e shoqnisë na shkon nëpër pushime.
Zhegu i qershorit e korrikut po na përvëlon trupin, po edhe po na zgjon pak kurreshtjen m’u lidh me muzikën, artin, fjalën, trupin… dhe njani-tjetrin. Çka kemi këtë javë në Monday Marks?
Ngjarja kryesore osht hapja me 5 korrik e Autostrada Biennale n’Prizren, kurume nga Erzen Shkololli, me plot artista t’mira nga vendi dhe bota.
Më 2 korrik, në AMC Hall, MC Kresha dhe Lyrical Son bashkë me Orkestrën Simfonike të Kosovës dhe dirigjentin Dzijan Emin, sjellin një koncert ku beati urban takohet me muzikën klasike. Dy ditë ma herët, më 30 qershor në Teatrin e Gjilanit, ngjitet në skenë komedia “Gënjeshtra” nga Florian Zeller, Në Tiranë, ndërkohë, në Galerinë e Artit osht çelë ekspozita “Ripërtëritje”, ku përmes veprave të Diana dhe Fatmir Mizirit, kurume nga Adela Demetja, eksplorohet trashëgimia poetike e objekteve, tekstileve dhe kohës që rrjedh; ndërsa sot më 30 qershor në COD Tiranë promovohet libri “Princa të Lilit, bij të Arbërit, familjarë të Sulltanit” nga Thomas Frashëri.
Kthehemi në Prishtinë, më 3 korrik në Sekhmet Project Space, aktivistja Xheni Karaj vjen me një diskutim të hapun për politikat feministe queer. Për ata që dojnë me gjet qetësinë mes kësaj vale verore, Abbeyoga kthehet në Taukbahqe dhe Parkun e Qytetit me sesione joge në natyre.
Ndërsa për ata që dojnë m’u vesh me shije e m’u kanë pak playful Blushy Dee Blush në Prishtinë ofron vintage që të fton me lujt me features verore – prej korsetave te fundat, gjithçka me ngjyrë e personalitet.
Të dilleve, Lily’s në Pejton bashkë me byrektoren Destani sjellin jo brunch por burek, një meny që kalon përtej klisheve burekiste. Dhe për freski, provojeni limunadën e shpisë të gazume me levandë. E kena prova, jena kënaq.
Kënaquni edhe ju me Monday Marks. Mpuq.
Me pa e me përjetu: Autostrada Biennale kurume nga Erzen Shkololli / Prizren
Ngjarja kryesore e artit kontemporan këtë vit n’Kosovë osht bienalja që mbahet në Prizren me titull Autostrada Biennale. Epiqendrën e ka në ish bazën ushtarake gjermane, por punimet janë të shpërndame gjithandej Prizrenit, në hamame, hapsina të hapuna e t’vjetra dhe shtëpi të vjetra. Sivjet osht edicion shumë i veçantë sepse kurator osht Erzen Shkololli, dhe puna në këtë ekspozitë masive si nga numri i artistëve ashtu edhe nga thellësia narrative, paraqet edhe një rikthim i artistit dhe kuratorit pejon pas viteve të udhëheqjes së Galerisë Kombëtare në Shqipni dhe kurimit jashtë vendit. S’po e zgasim shumë sepse Suzanne ka me mbulu këtë ngjarje me shkrime dhe foto-album enkas, në ndërkohe, për më shume info linkun e keni këtu.
Me dëgju: Red Bull Symphonic: MC Kresha & Lyrical son me simfoni / AMC Hall, Prishtinë
Një bashkëpunim i pazakontë po sjell një valë të re në skenën muzikore të Kosovës: Mc Kresha dhe Lyrical Son, së bashku me dirigjentin e mirënjohun Dzijan Emin dhe Orkestrën Simfonike të Kosovës, kanë mu ngjitë në skenën e AMC Hall për një koncert që sfidon kufijtë mes hip-hopit dhe muzikës klasike.
Ky nuk osht veç një koncert. Osht një udhëtim i ri tingujsh, një eksperiment i guximshëm artistik që premtton me pru emocion, befasi dhe një mënyrë të re për me përjetu muzikën e artistave që e kanë formësu një brez të tanë fansash. Në këtë natë, simfonia takohet me ritmin urban – dhe rezultati pritet mu kanë magjepsës. Ngjarja osht me 2 korrik, e për bileta, natyrisht i keni dostat tonë në Rave Travel!
Me pa: Premiera e shfaqjes “Gënjeshtra” nga Florian Zeller / Teatri i qytetit, Gjilan
Veç edhe dy ditë na ndajnë nga premiera e shfaqjes “Gënjeshtra” nga dramaturgu i njohun francez Florian Zeller, nën regjinë e Ekrem Sopit. Më 30 qershor, ora 20:00, Teatri i Gjilanit hap dyrt për një komedi elegante që zhbiron marrëdhaniet, dyshimet dhe të vërtetat që fshehen mas çdo buzëqeshjeje. Me një kast të shkëlqyshem: Gani Rrahmani, Qendresa Jashari, Alban Shahiqi dhe Safete Mustafa Baftiu, “Gënjeshtra” i fton shikusit të zbulojnë hijet që mesin mas një gënjeshtër e vogël, të qeshin me ironinë therëse të dialogjeve dhe të ndihen të tronditun nga sinqeriteti i heshtjeve. Repriza e shfaqjes jepet më 1 korrik, po në orën 20:00. Një komedi që ju shtin me mendu: a osht gënjeshtra shpesh ma e butë se e vërteta?
Me pa: Ekspozita e Diana dhe Fatmir Miziri / Galeria e qytetit, Tiranë
Galeria e Artit Tiranë tashmë e ka çel ekspozitën “Ripërtëritje”, kurume nga Adela Demetja, në bashkëpunim me Tirana Art Lab. Kjo ekspozitë shënon një rikthim të fuqishëm të dialogut krijus midis Diana dhe Fatmir Mizirit, një dyshe që ka lanë gjurmë të thella në historinë e artit bashkëkohor shqiptar.
Diana e ndjerë (1951–2005) dhe Fatmir Miziri, pionierë të arteve të aplikume në Shqipëri, eksplorojnë përmes veprave të tyre dimensionin poetik të materialit dhe objektit. Ekspozita përfshin tekstile delikate të krijume nga Diana Miziri gjatë viteve ’90 dhe objekte të përzgjedhuna nga cikli i gjatë krijues i Fatmir Mizirit, nga 1995 e deri më sot. “Ripërtëritje” mbetet e hapun deri më 10 korrik dhe ju fton me reflektu mbi trashëgiminë, transformimin dhe ndërlidhjen e të kalumes me të tashmen.
Me fol: Bisedë me Xheni Karajn për politikën feministe queer / Project space Sekhmet, Prishtinë
Shumëkush e sheh feminizmin si lëvizje që organizohet mbi çashtjen gjinore përmes prizmit të gruas, ndërsa atë queer si lëvizje që ma shumë merret me seksualitetin. Kolektivi për mendim dhe veprim feminist e ka ftu Xheni Karajt, aktiviste feministe queer nga Shqipnia, me diskutu për kontributet dhe jetët radikale të shumë prej feministeve/ëve queer përgjatë historisë që e kanë sfidu këtë kategorizim, tu i refuzu ndasitë dhe tu i pa këto dy pozicione të ndërthuruna me njana-tjetrën rreth një projekti të përbashkët -çlirimin e të gjithave/ëve nga çdo sistem shtypës. Kjo osht edhe baza e diskutimit që organizohet në Project Space Sekhmet, të ejten me 3 korrik.
Me ushtru & qetësu: Yoga në natyrë / Taukbashçe, Prishtinë
Me ardhjen e verës, Abbeyoga rikthehet në Kosovë me pru pak qetësi dhe energji pozitive përmes sesioneve të saj të njohuna të jogës në natyrë. Këtë sezon, yoga sesionet po mbahen në hapsinën e gjelbërt të Parkut të Qytetit dhe në Tauk Bahqe, tu ofru një përvojë rigjeneruese për të gjithë. Programi veror i Abbeyoga osht i hapur për të gjitha moshat, gjinitë dhe nivelet e përvojës. Çdo sesion përfshin meditime, ushtrime të frymëmarrjes (pranayama) dhe poza jogike (asanas), të dizajnume me përkushtim dhe dashni për me ndihmu përmirësimin e shëndetit dhe cilësisë së jetës. Në thelb të programit qëndron Hatha Yoga, me grupe mikse dhe një qasje të hapun e gjithëpërfshirëse. Sesionet janë të marteve dhe ejteve e detajet i gjeni në këtë link.
Me lexu: Promovimi i librit “Princa të Lilit, bij të Arbërit, familjarë të Sulltanit” nga Thomas Frashëri / COD, Tiranë
Thomas Frashëri e mban mbiemnin e famshëm shqiptar, por për nga arsimimi e përvoja e punës, ma afër i ka qëndru diplomacisë e administratës shtetnore. Tash Thomasi po vjen me një libër të ri që pikënisje e ka stemën e njohun të Karl Topisë të shekulli XIV dhe synon me gjurmu e zbërthy momente të randësishme të Mesjetës në Arbëri dhe vijat komunikuse nga Franca e Napoli e deri te Hungaria, Roma e Konstandinopoja. Libri “Princa të Lilit, bij të Arbërit, familjarë të Sulltanit” i Thomas Frashëri, botim i “Onufrit” prezantohet të hanën me 30 qershor, në qendrën COD në Tiranë.
Me vesh: Tesha vintage nga Blushy Dee Blush / Prishtinë
Na në Suzanne i dojmë shumë teshat e dashtuna ma heret nga vintage shitoret e Kosovës. Një faqe e tillë me plot sende osht Blushy Dee Blush e themelume nga Andra dhe Viola. Ka ardhë tash vera kah dera, edhe ju mundeni me hy n’dyer të kllabave, plazhave, festivaleve e negate me funda lozonjar, korseta sexy, topa tërheqës, e plot sende tjera që pronaret e BDB i përzgjedhin me shije. Kqyreni linkun se diçka keni me gjetë 100%.
Me hangër: “Jo brunch po burek” / Lily’s Pejton, Prishtinë
Brunchi osht i mirë të dilleve, po Lily’s në Pejton thotë qe bureku osht edhe ma i mirë. Kështu që çdo të dille Lily’s bashkë me byrektorën e famshme urbane Destani, sjellin kombinime burekash me shije të ndryshme, jo veç mish ose djath po edhe përmbajtje që mbushin petët e brumit në krejt Ballkanin, prej kërpurdhave e deri te pula me curry. Neve na pëlqen shumë një burek me mish pule, mollë e rush të thatë që pregaditet në Trandafilin Mistik, te laguna e Lezhës, pregaditun prej Diellës – qe një propozim i joni për Lily’s dhe Destanin për të dillen e ardhshme./Katror.info
Marrë nga Suzanne Podcast.
