15 vjet pas premierës së filmit “The Social Network”, është njoftuar një vazhdim që do të trajtojë kapituj të rinj në historinë e një prej rrjeteve sociale më me ndikim sot. Edhe pse filmi origjinal i vitit 2010 u drejtua nga David Fincher, pjesa e re po drejtohet nga Aaron Sorkin, skenaristi i pjesës së parë dhe fitues i çmimit Oscar.
Ndryshe nga filmi i mëparshëm, i cili u frymëzua nga libri “Accidental Billionaires”, vazhdimi ka titullin punues “Social Network II” dhe bazohet në një seri artikujsh investigativë të quajtur “Dosjet e Facebook-ut”, të botuar në vitin 2021 nga Wall Street Journal, shkruan Top Radio Albania.
Këto tekste ekspozojnë problemet e brendshme të Meta-s (më parë Facebook), duke përfshirë efektet negative të algoritmeve, përhapjen e dezinformatave dhe konfliktin midis fitimit dhe etikës.
Mundesh me e lexu edhe...
Vazhdimi po prodhohet nga Sony Pictures, me Todd Black, Peter Rice, Stuart Besser dhe vetë Sorkin midis producentëve. Kasti nuk është konfirmuar ende dhe mbetet e panjohur nëse Jesse Eisenberg do ta riluajë rolin e tij si Mark Zuckerberg.
Rikujtojmë se filmi i parë pati një sukses të jashtëzakonshëm, fitoi 226 milionë dollarë në nivel global dhe fitoi tre çmime Oscar, përfshirë atë për skenarin më të mirë të adaptuar.
Përveç Eisenberg, në film luajtën edhe Andrew Garfield, Justin Timberlake dhe Rooney Mara. Është interesante që Sorkin foli për një vazhdim të mundshëm në vitin 2021, duke vënë në dukje atëherë se do ta xhironte vetëm nëse Fincher do të pranonte të drejtonte.
Megjithatë, ndërkohë ai ndryshoi mendje dhe tashmë filloi të shkruante skenarin. Filmi i ri është ende në fazat e hershme të zhvillimit, por duke pasur parasysh temën aktuale dhe suksesin e mëparshëm, pritjet janë të larta./Katror.info
Përgatiti:
