Njësitë shqiptare dhe austriake të Forcës Operacionale Rezervë të Multinacionaleve (MN ORF) kanë përfunduar sot vendosjen e tyre në Kosovë, duke mbështetur misionin e KFOR-it të udhëhequr nga NATO. Këto njësi kanë zëvendësuar forcat bullgare dhe greke në terren, shkruan Katror.info.
Forca Operacionale Rezervë (ORF) forcon kapacitetet operative dhe gatishmërinë e KFOR-it për të përballuar çdo skenar të mundshëm në terren. Ky rotacion siguron që trupat të mbeten të përqendruar dhe të trajnuar mirë, duke përmbushur në mënyrë efektive mandatin e gjatë të KFOR-it të bazuar në Rezolutën 1244 të Këshillit të Sigurimit të Kombeve të Bashkuara nga viti 1999.
KFOR vazhdon të zbatojë mandatin e saj për të kontribuar në një ambient të sigurt dhe të qetë për të gjithë banorët dhe komunitetet në Kosovë, duke siguruar lirinë e lëvizjes në mënyrë të barabartë dhe të paanshme. KFOR punon ngushtë në koordinim me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX) në rolet e tyre përkatëse si përgjegjës për sigurinë./Katror.info
Mundesh me e lexu edhe…
Përgatiti:
