E sapoemëruara zëvendësministre e Shëndetësisë dhe Mbrojtjes Sociale, Ina Majko, do të mbulojë çështjet e njerëzve më në nevojë të shoqërisë në fushën e mbrojtjes sociale.
Kështu ka bërë me dije Kryeministri i Shqipërisë Edi Rama në një postim të fundit në mediat sociale.
“Ina erdhi në skuadrën tonë si një përzgjedhje nga komuniteti Rom dhe si e para përfaqësuese e këtij komuniteti në nivelin e kabinetit qeveritar në historinë e vendit, ajo do të mbulojë pikërisht çështjet e njerëzve më në nevojë të shoqërisë në fushën e Mbrojtjes Sociale”, ka shkruar ai.
Mundesh me e lexu edhe…
Rama ka shkruar se Majko është prurja e parë, ndër shumë të tjera në vijim të rrugës së re që hapi 11 maji, drejt Shqipërisë 2030 në Bashkimin Evropian.
“Ajo sapo është zgjedhur zëvendës ministre e Shëndetësisë dhe Mbrojtjes Sociale, pasi ka spikatur në skuadrën e 11 majit, mes atyre që edhe pse nuk ia dolën të fitonin një vend në Kuvendin e ri, ishin një vlerë e shtuar e PS në përfaqësimin e komuniteteve e të grupeve të ndryshme të interesit”.
Ai ka vijuar duke thënë se “historia e Ina Majkos është historia e një fëmije të rritur mes paragjykimesh e vështirësish të mëdha ekonomike dhe historia e një vajze të talentuar, plot energji e vendosmëri për t’ia dalë, e cila jo vetëm kreu me rezultate të larta studimet jashtë vendit dhe flet pesë gjuhë të huaja, por edhe u bë një zë i bukur i komunitetit të saj në platformat sociale”.
“Uroj që Ina të jetë një vlerë e shtuar edhe në punën e Ministrisë së Shëndetësisë dhe Mbrojtjes Sociale, e një mbështetje më shumë për familjet e fëmijët në nevojë”, ka shtuar Rama./Albanian Post/Katror.info
