Nata që përherë do të kujtohet si ndër më të rrallat në skenën muzikore të Prishtinës ka ndërthurur tingujt e hip-hopit me ata të muzikës klasike në mënyrë madhështore. Ambienti në periferi të kryeqytetit, që ka shërbyer si sallë e këtij koncerti, të mërkurën mbrëma është mbushur me mijëra duar që janë ngritur me ritmin e gjallë të muzikës. E organizuar nga “Red Bull Kosova”, e kuruar nga “Sose Entertaiment” në skenën e veshur me ndriçime të larmishme dhe me një sfond simfonik të fuqishëm, kanë dalë ikonat e hip-hopit kosovar: MC Kresha dhe Lyrical Son. Por këtë herë, jo vetëm me beat-et që janë dëgjuar gjithmonë, por të mbështetur nga një orkestër e plotë simfonike, një riaranzhim që i ka dhënë një dimension të ri çdo vargu dhe çdo rime.
E gjithë skena është dukur si një udhëtim në një univers tjetër. “Red Bull Symphonic” nuk ka qenë thjesht një koncert, ka qenë një eksperiment artistik që çan kufijtë mes zhanreve dhe bashkon dy botë të ndryshme muzikore në një formë të vetme unike dhe të paharrueshme. Nën drejtimin artistik të Dzijan Emin, dirigjentit maqedonas me famë ndërkombëtare, tingujt e violinave, trumbetave dhe perkusioneve klasike janë shkrirë me beat-et urbane dhe tekstet e drejtpërdrejta të MC Kreshës dhe Lyrical Son. Çdo këngë ka tingëlluar ndryshe, por prapëseprapë e njohur, një ndjesi që rrallëherë ndodh në koncerte.
Dzijan Emin, një emër që ka performuar me orkestrat më të mëdha në botë dhe në Prishtinë, ka përçuar jo vetëm ekspertizën e tij muzikore, por edhe një vizion: që muzika klasike dhe ajo urbane jo vetëm që mund të bashkëjetojnë, por edhe të lulëzojnë bashkë. MC Kresha, i lindur në Mitrovicë, me një karrierë që shtrihet për më shumë se dy dekada, ka përçuar nëpërmjet vargjeve të tij një emocion të fortë që e ka ndier e gjithë audienca. Nga “Lej flleshat” e deri te projektet më të reja, gjithçka është interpretuar ndryshe, me një solemnitet që vetëm një orkestër simfonike mund t’ia japë. Krah tij, Lyrical Son, artisti i Prishtinës që gjithmonë ka spikatur për rrjedhën e pastër dhe inteligjencën letrare të teksteve të tij, i ka dhënë skenës një frymë të re, një urtësi që ka rezonuar me çdo notë të interpretimit.
Mundesh me e lexu edhe…
Një pjesë e veçantë e koncertit ka qenë edhe prania e mysafirëve specialë. Shpat Deda, me zërin e tij të ndjeshëm dhe thellësinë emocionale që ai përcjell, ka sjellë një balancë mes forcës së hip-hopit dhe delikatesës së melodive, ndërsa reperi Lluni, pjesë e labelit PINT, ka shtuar energji të pastër me stilin e tij unik dhe flow-in e fuqishëm. Në fund, atyre u është bashkuar edhe Nuke, që është gjithashtu pjesë e labelit “Pint”.
Bashkë me Orkestrën Simfonike, pjesë e ansamblit kanë qenë edhe tre vokalistë mbështetës: Erletë Rexhepi, Etrit Nura dhe Margareta Shabani, të cilët janë angazhuar nga “RedBull Kosova”. Ata kanë treguar se janë “me fat që janë pjesë në këtë projekt madhështor”.
“Këtë bashkëpunim na ka mundësuar ‘RedBulli’, e unë si pjesë e ansamblit kam pasur fatin të jem në këtë projekt kaq madhështor. ‘RedBull Symphonic’ mbahet edhe në vende të tjera të botës e sot është mbajtur për herë të parë edhe në Kosovë dhe ka qenë një organizim fantastik”, ka thënë vokalistja Erletë Rexhepi, në një përgjigje për KOHËN. Artistët i ka konsideruar bashkëpunues dhe të sjellshëm, teksa ka treguar se gjatë provave kanë pasur komunikim të mirë edhe me dirigjentin.
“Publikut i ka pëlqyer shumë kombinimi i muzikës klasike orkestrale me hip-hop dhe e kanë pritur shumë mirë. Ne kemi kaluar shumë mirë me Mc Kreshën edhe Lyrical Son gjatë përgatitjes së koncertit… shumë artistë bashkëpunues dhe të sjellshëm, po ashtu edhe dirigjenti ka qenë shumë pozitiv gjatë gjithë kohës, gjë që na ka bërë ta shijojmë performancën në maksimum”, ka shtuar ajo.
Por ajo që e ka bërë vërtet këtë natë të paharrueshme, ka qenë përvoja kolektive që ka krijuar. ”Red Bull Symphonic” ka sjellë për publikun një koncert që ka rezultuar të jetë njëkohësisht një spektakël vizual, një ngjarje kulturore dhe një festë emocionale. Për më shumë se një orë e gjysmë, publiku nuk ka qenë vetëm spektator, por edhe pjesë e përjetimit.
“Ishte eksperiencë me të vërtetë unike dhe ndryshe prej koncerteve të zakonshme. Atmosfera ishte elektrizuese. ‘AMC Hall’ i ofron kushtet e nevojshme për këso organizimesh, por prapëseprapë mendoj se kemi nevojë për salla të tilla më afër qytetit të Prishtinës. Muzikën hip-hop po e dëgjojmë rrallë e më rrallë live nëpër koncertet shqiptare, andaj e vlerësoj shumë përkushtimin e artistëve dhe orkestrës që ofruan një spektakël të tillë, i gjithi live”, ka treguar përshtypjet e veta nga syri i publikut Viktor Ahmeti.
Organizim më i shpeshtë i këtyre ngjarjeve është kërkuar nga publiku, nën arsyen se dallohen elemente autentike.
“Përvoja ime në ‘Red Bull Symphonic’ ka qenë fantastike. Organizimi i ngjarjes, performuesit dhe orkestra kanë qenë në nivel superior. Një format unik me orkestër, i cili duhet të organizohet e promovohet më shpesh, për shkak të elementeve autentike të saj”, ka thënë për KOHËN, Pylljon Nura.
Ky koncert ka qenë dëshmi e fuqisë së bashkëpunimit, kur dy zhanre që duken të papajtueshme, si hip-hopi dhe muzika klasike, takohen në mënyrën e duhur, krijojnë diçka që shkon përtej muzikës, krijojnë histori. “Red Bull Symphonic”, përmes zërave të MC Kreshës dhe Lyrical Sonit, dhe orkestrës së drejtuar nga Dzijan Emin, ka bërë që mbrëmja e Prishtinës të tingëllojë më ndryshe se kurrë më parë. Të rinjtë kanë kërcyer, derisa muzika ka folur në një gjuhë që të gjithë e kanë kuptuar./KOHA/Katror.info
