Kori “Siparantum” asnjëherë nuk kthehet duarthatë nga garat. E kësisoj edhe kësaj here nga Danimarka vjen me Medaljen e Argjendtë në “Grand Prix of Nations” në kuadër të Lojërave Evropiane të Korit, që janë mbajtur në qytetin norvegjez Aarhus. Midis 130 koreve me rreth gjashtë mijë pjesëmarrës nga 35 vende, “Siparantum” në kategorinë ku ishte në konkurrencë ia ka dalë të jetë i argjendtë
Çmimet janë bërë të zakonshme për korin “Siparantum” nga Peja. Secili është një sukses i radhës për formacionin vokal, por edhe për vendin. Me këtë del fitimtar edhe shteti dhe kultura muzikore shqiptare që promovohet në skenat më të mëdha të muzikës. “Siparantumi” asnjëherë nuk kthehet duarthatë e kësisoj edhe kësaj here nga Danimarka vjen me Medaljen e Argjendtë në “Grand Prix of Nations” në kuadër të Lojërave Evropiane të Korit, që janë mbajtur në qytetin norvegjez Aarhus.
Midis 130 koreve me rreth gjashtë mijë pjesëmarrës nga 35 vende, “Siparantum” ia ka dalë goxha mirë të renditet në listën e garës.
Në ngjarjen që u mbajt prej 28 qershorit deri më 6 korrik, shteti i Kosovës u prezantua jo veç si pjesëmarrës, por edhe si zë i fuqishëm artistik duke përfaqësuar trashëgiminë e pasur kulturore dhe potencialin muzikor në skenën ndërkombëtare.
Mundesh me e lexu edhe...
“Siparantum” është paraqitur para publikut nordik me dy koncerte. Në atë në të cilin ka qenë në garë në kategorinë “Chamber Choir”, ku paraqiten vetëm ansamblet më të mira ndërkombëtare, kori nga Kosova ka interpretuar veprën “Me nji lule” të kompozitorit Memli Kelmendi, i cili edhe e ka drejtuar interpretimin. Ka jehuar pasditen e 5 korrikut në “Lille Sal”.
Gjithashtu kori në kuadër të programit garues ka interpretuar edhe veprat “Before the coming of the night” të Jan Van der Roost, “Mironczarnia” të Jakub Neske dhe veprën “Nyon Nyon” të Jake Runestad. Në këtë kategori qenë 11 kore, “Siparantum” u radhit i dyti ndër të argjendtit me 78.94 pikë. I pari ndër të artit, në këtë kategori ka dalë kori bullgar “Ohana me 92.88.
Juria ka qenë në përbërje prej muzikantëve danezë, si: Christian Fris-Ronsfeld, Maegrethe Debel Christensen dhe Steen Lindholm, ajo suedeze Helene Stureborg, turkja Başak Doğan, ai italian Giovanni Acciai, si dhe hungarezja Katalin Kiss.
Nga “Siparantum” shprehen se koncerti ka qenë dëshmi e përkushtimit të lartë artistik, precizitetit teknik dhe thellësisë interpretuese. Në mungesë të buxhetit, “Siparantum” ka marrë rrugë për në qytetin e dytë më të madh norvegjez me më pak se gjysmën e anëtarëve që posedon. Kanë qenë 24 anëtarë nga 50 sa ka gjithsej kori.
Dirigjenti e drejtuesi artistik i korit “Siparantum”, Memli Kelmendi, ka thënë se janë mësuar të interpretojnë si kor voluminoz dhe se kësaj here ka qenë më sfiduese puna sa i përket formacionit.
“Jemi munduar ta bëjmë më të mirën dhe kjo medalje është storie suksesi që e kemi përbrenda potencialit tonë. Ky është çmimi i 19-të i korit “Siparantum” dhe është shteti i 18-të që po e prekim. Uroj që ky do të jetë vetëdijesim për të tjerët që investimi në kulturë në asnjë moment nuk është i gabueshëm, sepse Kosova ka një potencial fantastik dhe të jashtëzakonshëm për ta promovuar kulturën tonë dhe këtë po e arrin. Arrijmë të jemi të barabartë me shtetet e tjera, të cilat nuk i kanë pasur sfidat tona dhe sigurisht se kanë traditë më të madhe kulturore”, ka thënë Kelmendi për KOHËN.
Pos këtij koncerti, “Siparantum” më 5 korrik u bë pjesë e koncertit me titull “Nordic Night” së bashku me korin danez “CÆCILIAKORET”, nën drejtimin e dirigjentit Michael Deltchev. Kori nga Peja interpretoi repertorin me vepra të stileve të ndryshme, me theks në veprat e kompozitorëve shqiptarë.
“Mbrëmja e përbashkët me korin danez në kuadër të koncertit ‘Nordic Nights’ ka qenë një prej paraqitjeve tona më të bukura mbase që i kemi pasur ndër vite. Me theks të veçantë vlerësoj paraqitjen e veprave të kompozitorëve shqiptarë”, ka konsideruar Kelmendi.
Ka thënë se janë përcjellë emocione tejet të bukura e të thella për çka, siç Kelmendi ka treguar, publiku është ngritur disa herë në këmbë.
“Një pjesë e publikut madje ka filluar të qajë me performancën që kemi pasur në këtë koncert të jashtëzakonshëm. E rëndësishme për ne është që po arrijmë të dëshmojmë potencialin dhe të promovojmë vlerat tona kombëtare në arenën ndërkombëtare në skena dhe koncerte të ndryshme botërore. Aq më bukur kur ndërlidhet muzika jonë me atë botërore. Besoj se kjo e fuqizon edhe më shumë potencialin që ne e kemi si shoqëri”, ka thënë Kelmendi.
Në kishën “Vor Frue Kirke” ka sjellë vepra si ajo tradicionale jugafrikane “Ukuthula” me soliste Dea Musliun, gjithashtu edhe këngën tjetër jugafrikane “Tshosholoza” me solist Leon Shehun.
Në këngën arbëreshe “Kopilje moj kopilje” e aranzhuar nga Kelmendi soliste ka qenë sopranoja Elona Alshiqi, përderisa është përcjellë nga Dior Morina me klarinetë e Denita Dedushaj në piano. Janë interpretuar edhe veprat “Pax” e Kelmendit, ajo afrikane e amerikane “Down in the river to pray”, “Ecce Novum” e Ola Gjeilo, kënga tradicionale “Moj e bukura more”, ajo tradicionale nga Ekuadori “Apamuy Shungo”, “Fire” nga Katerina Gimon, si dhe “Ave maris stella” nga Edvard Grieg.
Ngjarja, nga prezantimi në ueb-faqen e tyre, shkruhet se njihet si version kontinental evropian i Lojërave Botërore të Korit.
“…një festë madhështore e muzikës korale, ku zëra harmonikë dhe melodi të gëzueshme mbushin ajrin. Ndërsa Danimarka renditet me krenari midis vendeve më të lumtura në botë, ndieni frymën ngritëse dhe e përqafoni traditën e pasur të koreve të vlerësuara ndërkombëtarisht”, shkruhet aty.
Suksesi në “Grand Prix of Nations” vlerësohet si sukses i rëndësishëm në udhëtimin artistik të “Siparantum” dhe si frymëzim për brezat e ardhshëm.
