Një tjetër sukses për profesionistët e rinj të drejtësisë nga Kosova. Avokatja Liriona Morina, është përzgjedhur ndër avokatët e rinj më të mirë në Evropë dhe është shpallur finaliste në kuadër të garës prestigjioze Young European Lawyers Contest 2025, të organizuar nga Akademia Evropiane e Drejtësisë (ERA), shkruan Katror.info.
Lajmin e ka ndarë vetë Morina, duke u shprehur se ndihet “shumë e lumtur për përzgjedhjen dhe për mundësinë për të përfaqësuar vendin dhe përvojën e saj në një platformë kaq të rëndësishme evropiane.”
Ky konkurs ka për qëllim të promovojë dhe nxisë cilësinë në profesionin juridik në Evropë, duke i dhënë hapësirë avokatëve të rinj të demonstrojnë njohuritë, aftësitë dhe përkushtimin e tyre për drejtësi dhe shtetin e së drejtës.
Mundesh me e lexu edhe…
Pjesëmarrës nga vende të ndryshme të Bashkimit Evropian dhe jashtë tij garojnë përmes sfidave ligjore komplekse, të mbështetura nga mentorë dhe gjykatës me përvojë të gjerë.
Për Kosovën, një përfaqësim i tillë përbën një hap përpara drejt integrimit dhe afirmimit të profesionistëve të rinj në arenën ndërkombëtare./Katror.info
