Startup-et dhe komuniteti i biznesit të ri në Kosovë do të kenë qasje në shërbime juridike falas, falë një marrëveshjeje të re bashkëpunimi të nënshkruar ndërmjet Innovation Centre Kosovo (ICK) dhe Shoqërisë së Avokatëve “Kërveshi & Partners”.
Kjo marrëveshje, e nënshkruar së fundmi në Prishtinë, synon të ofrojë mbështetje profesionale për zhvillimin e qëndrueshëm dhe të sigurt të veprimtarive afariste të bizneseve të sapoformuara në vend.
Në kuadër të partneritetit, bashkëpunimi do të fokusohet në shkëmbimin e ekspertizës, përvojës dhe resurseve mes palëve, me synim mbështetjen e zhvillimit të bizneseve të reja.
Mundesh me e lexu edhe…
”Pjesë e kësaj marrëveshjeje janë edhe trajnimet e përqendruara në temat si: Procedurat administrative për themelimin dhe regjistrimin e bizneseve; Cështjet e ligjit të punës, akteve të brendshme, marrëdhënies së punës, procedurave disiplinore etj; Mos konkurrueshmërisë në treg; Ruajtja e konfidencialitetit në marrëdhënien e punës dhe raporteve kontraktore; Draftimi i Statuteve dhe Rregulloreve të bizneseve; Përpilimi i kontratave të punës dhe rregullimi i marrëdhënieve të punës; Të drejtat dhe detyrimet e punëdhënësit dhe punëmarrësit etj”, thuhet në njoftim.
Kjo nismë vjen në një kohë kur ekosistemi i startup-eve në Kosovë po njeh rritje, por përballet ende me mungesë të qasjes në përkrahje të specializuar, sidomos në fushën ligjore.
Me këtë marrëveshje, ICK synon të adresojë pikërisht këtë boshllëk, duke i dhënë bizneseve të reja një mjet të rëndësishëm për të vepruar në mënyrë të sigurt dhe të strukturuar në treg.
Shoqëria e Avokatëve “Kërveshi & Partners” është një nga firmat e njohura ligjore në vend, ndërsa Kujtim Kërveshi, themelues dhe udhëheqës i saj, u vlerësua nga ICK për gatishmërinë dhe përkushtimin ndaj zhvillimit të sipërmarrjes në Kosovë.
Ky bashkëpunim pritet të krijojë një model të qëndrueshëm të mbështetjes ligjore për bizneset e reja, duke kontribuar në rritjen e cilësisë dhe qëndrueshmërisë së ndërmarrjeve vendore. /Katror.info
Përgatiti:
