Jeta Zeka dhe Zyrije Pireva janë dy emrat që po përfaqësojnë Kosovën në një nga ngjarjet më të rëndësishme evropiane për zhvillimin e basketbollit të vajzave – FIBA European Women’s Basketball Summit, që po mbahet në qytetin Postonja të Sllovenisë, shkruan Katror.info.
Zeka, në rolin e gjyqtares, dhe Pireva si trajnere, janë deleguar nga Federata e Basketbollit të Kosovës (FBK), e cila vazhdon të investojë në fuqizimin dhe përgatitjen e kuadrove të reja, me theks të veçantë tek gratë në sport – një hap i rëndësishëm drejt barazisë gjinore dhe rritjes së cilësisë në basketbollin kosovar.
”Ato janë deleguar nga Federata e Basketbollit e Kosovës (FBK), që vazhdon të investojë në kuadro, sidomos në trajnere dhe gjyqtare”, theksohet në njoftim.
Mundesh me e lexu edhe…
Programi përfshin sesione të specializuara, punëtori, ushtrime praktike dhe diskutime me eksperte dhe ekspertë të basketbollit evropian.
Për Zekën dhe Pirevën, pjesëmarrja në këtë samit përfaqëson një mundësi të vlefshme për të përfituar nga përvoja ndërkombëtare dhe për ta sjellë atë përvojë në shërbim të basketbollit në Kosovë.
Samiti zhvillohet çdo vit që nga viti 2007 dhe deri më tani ka mbledhur mbi 1,460 pjesëmarrëse nga 47 Federata Evropiane, duke shërbyer si platformë për ndërtimin e rrjeteve dhe rritjen profesionale të grave në basketboll.
Pjesëmarrja e Kosovës në këtë event thekson përkushtimin e FBK-së ndaj zhvillimit të sportit të vajzave dhe krijimit të mundësive të barabarta për të gjithë ata që duan të kontribuojnë në këtë fushë.
Me përfshirjen e Zekës dhe Pirevës, Kosova vazhdon të dëshmojë se ka potencial dhe është e përkushtuar për të qenë pjesë aktive e skenës evropiane të basketbollit. /Katror.info
Përgatiti:
