Qytetarët në Danimarkë mund të fitojnë të drejtën e autorit mbi pamjen dhe zërin e tyre, sipas një projektligji të ri të paraqitur në parlamentin danez, që synon luftimin e përhapjes së materialeve “deepfake” të krijuara nga inteligjenca artificiale.
Ligji i propozuar do ta bëjë të paligjshme shpërndarjen e imazheve, videove dhe regjistrimeve audio të manipuluara, që imitojnë një person real pa pëlqimin e tij/saj. Platformat online që nuk respektojnë ligjin do të përballen me gjoba të rënda.
Megjithatë, paroditë dhe satirat do të përjashtohen nga ky ligj, sipas deklaratës së qeverisë daneze.
Mundesh me e lexu edhe…
“Me këtë projektligj, ne dërgojmë një mesazh të qartë: çdo njeri ka të drejtë mbi trupin e tij, zërin e tij dhe pamjen e tij. Kjo duket se nuk garantohet mjaftueshëm nga ligji aktual përballë zhvillimit të AI-së gjenerative,” u shpreh ministri danez i kulturës, Jakob Engel-Schmidt, për The Guardian, përcjell Katror.info.
Propozimi vjen në një kohë të shtuar shqetësimi për rritjen e numrit të materialeve deepfake dhe rrezikut që ato paraqesin për dezinformimin publik.
Në vitin 2024, imazhe të manipuluara të Papa Françeskut duke përqafuar Madonnën, të postuara nga vetë këngëtarja, u shpërndanë gjerësisht dhe u panë nga miliona njerëz, çka çoi Vatikanin të paralajmërojë për rreziqet e abuzimit me AI-në./Katror.info
