Kombëtarja U19 e Kosovës në hendboll (femrat) ka nisur me sukses fazën për plasman në Kampionatin Evropian B që po zhvillohet në Gjeorgji, duke e mposhtur bindshëm përfaqësuesen e Izraelit me rezultat 35:26, shkruan Katror.info.
Në ndeshjen e zhvilluar të premten paradite në Telavi, vajzat kosovare treguan dominim të plotë që nga minuta e parë. Me një nisje të furishme, ato krijuan epërsi prej 5:0 dhe më pas 11:1, duke kontrolluar lojën në tërësi deri në fund të takimit. Pjesa e parë përfundoi në favor të Kosovës me rezultat 17:10.
Martina Bibaj ishte lojtare udhëheqëse, duke realizuar 10 gola nga 12 tentime. Performancë të shkëlqyer dhanë edhe Diona Dresh me 7 gola nga 9 tentime, si dhe Arjeta Imeraj me 6 gola nga 7 tentime. Sara Gjergjaj dhe Zoja Kameraj kontribuan me nga 3 gola, ndërsa Orgesa Gola dhe Elona Zeneli shtuan nga 2 gola secila. Klaudia Ukaj dhe Arona Krasniqi realizuan nga një gol.
Mundesh me e lexu edhe…
Portierja Donjeta Shabani shkëlqeu me 13 pritje vendimtare, duke u shpallur lojtarja më e mirë e ndeshjes.
Fitorja ndaj Izraelit u sigurua falë kontributit të të gjitha lojtareve, të cilat dhanë maksimumin për të siguruar suksesin e radhës në këtë kampionat.
Kombëtarja e Kosovës U19 tani do të luajë ndeshjen për vendin e pestë në Kampionatin Evropian B, e cila do të zhvillohet të dielën. Kjo paraqitje është një tjetër dëshmi e progresit të vazhdueshëm të hendbollit të femrave në Kosovë./Katror.info
