Guvernatori i Bankës Qendrore të Kosovës, Ahmet Ismaili, së bashku me Zëvendësguvernatoren Nesrin Shileku-Shala, priti në takim Ambasadorin e ri të Hungarisë në Kosovë, SH. T. z. László István Dux, i shoqëruar nga Atasheu Ekonomik dhe Tregtar, Áron Kerékgyártó, të cilin e ka informuar lidhur me zhvillimet kryesore në sektorin financiar, avancimin e kornizës ligjore dhe rregullative, si dhe për qëndrueshmërinë dhe integritetin e sistemit financiar.
Gjatë takimit, Guvernatori Ismaili e uroi Ambasadorin për detyrën e re dhe vlerësoi marrëdhëniet e mira të bashkëpunimit me Ambasadën e Hungarisë, duke theksuar mbështetjen e vazhdueshme të këtij shteti ndaj sektorit financiar në Kosovë, veçanërisht në kuadër të përfaqësimit të përbashkët në FMN dhe Bankën Botërore.
Sipas njoftimit të BQK, Guvernatori informoi ambasadorin Dux për zhvillimet kryesore në sektorin financiar, përfshirë avancimin e kornizës ligjore dhe rregullative, si dhe përpjekjet e BQK-së për anëtarësimin e Kosovës në Zonën Unike të Pagesave në Euro (SEPA). Ai foli edhe për projektin strategjik për krijimin e sistemit të pagesave të shpejta – TIPS Clone, i cili synon rritjen e efikasitetit dhe përfshirjes financiare në vend.
Mundesh me e lexu edhe...
Në takim u diskutuan gjithashtu reformat institucionale të brendshme të BQK-së, të cilat synojnë forcimin e kapaciteteve dhe përmirësimin e qeverisjes së brendshme, në përputhje me rekomandimet e partnerëve ndërkombëtarë.
Guvernatori shprehu mirënjohjen për mbështetjen e institucioneve hungareze brenda strukturave të Bashkimit Evropian në drejtim të forcimit të sistemit financiar në Kosovë dhe harmonizimit të tij me standardet evropiane.
Në përmbyllje të takimit, palët rikonfirmuan përkushtimin për forcimin e bashkëpunimit bilateral dhe mbështetjen e mëtejshme të rrugëtimit të BQK-së drejt integrimit evropian dhe reformimit të mëtejshëm institucional./Katror.info
