Në Mamushë, u organizua edicioni i 16-të i “Festivalit Ndërkombëtar të Domates”, një ngjarje tradicionale që promovon bujqësinë vendore dhe forcimin e lidhjeve ndërkulturore.
Festivali u organizuar nga Komuna e Mamushës, e vetmja me shumicë turke në Kosovë, ndërsa mblodhi një numër të madh pjesëmarrësish, përfshirë figura të larta shtetërore dhe diplomatike.
Të pranishëm në këtë aktivitet ishin kryeministri i Kosovës, Albin Kurti, ministri për Zhvillim Rajonal dhe kryetari i Partisë Demokratike Turke të Kosovës (KDTP), Fikrim Damka, ambasadori i Turqisë në Kosovë, Sabri Tunç Angılı, ministri i Bujqësisë, Faton Peci, kryetari i Komunës së Mamushës, Abdülhadi Krasniç, si dhe deputetë nga Kosova dhe Turqia, kryetarë komunash, përfaqësues të organizatave turke në vend dhe shumë mysafirë të tjerë.
Mundesh me e lexu edhe…
Ceremonia u zhvillua në ambientet e shkollës fillore “Atatürk” në Mamushë, ku në fjalën e tij, kryeministri Kurti vlerësoi kontributin e bujqve të kësaj komune në zhvillimin e bujqësisë në vend.
“Bujqit e zellshëm të Mamushës, përmes përkushtimit dhe punës së tyre të palodhshme, kanë bërë që emri i këtij qyteti dhe produktet e tij, veçanërisht domatet, të njihen edhe përtej kufijve të Kosovës”, tha Kurti.
Nga ana tjetër, ambasadori turk në Prishtinë, Sabri Tunç Angılı, theksoi rëndësinë strategjike të Mamushës për bujqësinë orientuar drejt eksportit, duke shtuar se komuniteti turk përbën një urë të fortë shpirtërore dhe kulturore ndërmjet dy vendeve.
“Komuniteti turk në Kosovë është një komponent thelbësor i Republikës së Kosovës. Ai kontribuon në çdo fushë të jetës, duke i shtuar vlerë vendit dhe duke forcuar lidhjet tona dypalëshe”, u shpreh ambasadori Angılı.
Ministri Damka, në fjalën e tij, vlerësoi punën dhe përkushtimin e banorëve të Mamushës, duke e cilësuar qytetin si krenari të komunitetit turk në Kosovë.
Ndërsa kryetari i Komunës, Abdülhadi Krasniç, prezantoi arritjet e fundit të komunës në sektorë të ndryshëm, me fokus të veçantë në zhvillimin bujqësor.
Festivali u përmbyll me një program kulturor ku u shfaqën valle tradicionale dhe performanca muzikore nga këngëtarë vendas dhe ndërkombëtarë, duke e kthyer këtë ngjarje në një festë të vërtetë për qytetarët dhe mysafirët./RTK/Katror.info
