Festivali më i madh muzikor në Kosovë, Sunny Hill Festival, ka zbuluar zyrtarisht emrat e artistëve që do të performojnë në edicionin e sivjetmë, i cili do të mbahet nga 1 deri më 3 gusht 2025, në Parkun Sunny Hill në Bërnicë, shkruan Katror.info.
Në listën e publikuar sot, spikasin emra të mëdhenj të skenës ndërkombëtare, përfshirë Dua Lipa, Fatboy Slim, Shawn Mendes, Mochakk, Anyma, Peggy Gou, Headie One, TSHA dhe Edis. Bëhet fjalë për artistë që kanë ngjitur skenat më të mëdha botërore dhe që janë fitues të çmimeve prestigjioze si Grammy, MTV Music Awards dhe Brit Awards.
Në hapje të festivalit, më 1 gusht, do të performojë vetë Dua Lipa, bashkëthemeluese e festivalit dhe një nga emrat më të suksesshëm të muzikës pop në dekadën e fundit. Ndërkohë, mbrëmja përmbyllëse do të kurorëzohet me një performancë speciale nga artistja koreano-gjermane Peggy Gou, e njohur për setet elektrizuese në festivalet elektronike botërore.
Sunny Hill Festival 2025 pritet të sjellë tri net të paharrueshme muzikë, energji dhe bashkim kulturash, duke e konfirmuar edhe një herë Prishtinën si një destinacion të rëndësishëm për skenën e muzikës ndërkombëtare./Katror.info
