Në Prishtinë u hap Panairi i Gruas “Me zemër për diasporën”, organizuar nga Oda Ekonomike e Kosovës (OEK), raporton Ekonomia Online.
Kryetari i OEK-ut, Lulzim Rafuna, vuri në dukje rëndësinë e panairit, jo vetëm si vend ekspozimi, por si dëshmi e sakrificës dhe suksesit të grave në biznes.
Ai theksoi se pa fuqizimin e gruas nuk ka ekonomi të fortë.
Mundesh me e lexu edhe…
“Është kënaqësi që të hapim këtë panair. Pasi që ishim në Gjilan, Viti dhe Kamenicë, tani jemi në Prishtinë. Është një mundësi shumë e mirë për të bashkëpunuar. Ky panair është më shumë se ekspozim i mallit. Është një panair, ku gjendet frymëzimi që sot përfaqëson një grua, tregon sakrificën që e ka pasur prej ditës që ka filluar biznesin deri në momentin kur kanë triumfuar. Përveç që është një storie suksesi, ne kemi treguar se pa fuqizimin e gruas nuk do të kemi edhe ekonomi të fortë .
Zonjat që kanë ekspozuar e tregojnë më së miri progresin që po e bëjmë, jo vetëm si shoqëri kosovare, por që të arrijmë që ekonominë tonë ta çojmë përpara bashkërisht me të gjithë komunitetin tjetër. Komuniteti që është mbledhur sot është krenaria e Kosovës”, tha Rafuna.
Pjesëmarrëset prezantuan prodhime të ndryshme si mjedra të freskëta, punime artizanale, argjend dhe veshje kombëtare etj., duke e vlerësuar panairin si mundësi të mirë për promovim dhe lidhje me klientët, përfshirë edhe diasporën.
Ndër pjesëmarrëset në panair ishte edhe Ilmie Bytyqi, kultivuese e mjedrave. Ajo vlerësoi interesimin e madh të qytetarëve dhe diasporës për prodhimet vendore.
“Është i mirëseardhur panairi. Ka punë të mjaftueshme, sepse po na njohin edhe njerëzit për produktet që i kemi dhe shitja është më e mirë. Ne merremi që katër vjet me kultivimin e mjedrës. Interesimi është i madh. Klientët kërkojnë gjithherë mjedra të freskëta”, tha Bytyqi.
Edhe pjesëmarrësja tjetër në panair, që u prezantua vetëm si Niki, e cila punon me argjend dhe minerale, e cilësoi panairin si një mundësi të mirë për promovimin e punës së saj.
“Këtë panair e ka bërë OEK-u, që i ndihmon qytetarët. Unë merrem me argjend dhe me minerale. Ka interesim për blerje. Ata që më njohin, i marrin. Panairet janë të mira për promovim. Po më pëlqen që të rejat kanë shumë hobi. Mundohen të krijojnë diçka nga vetja”, tha ajo.
Panairi i Gruas “Me zemër për diasporën” zgjat dy ditë./EO/Katror.info
