OpenAI prezantoi të enjten modelin e saj më të ri gjenerues të inteligjencës artificiale, GPT-5. Sipas CEO-së Sam Altman, ChatGPT tani është “si të kesh një superfuqi” dhe ekuivalente me “një ekspert të nivelit PhD në çdo fushë që të duhet, në çdo moment, për të të ndihmuar të arrish çdo qëllim.”
Megjithatë, vetëm pas një dite testimesh, shumë përdorues shprehën zhgënjim. Jo vetëm sepse GPT-5 ende gabon në pyetje bazike, por edhe sepse, sipas ankesave në Reddit, ka prishur shumë prej proceseve të tyre të punës, raportojnë mediat e huaja, përcjell Katror.info.
Për shkak të reagimeve të shumta, Altman njoftoi se përdoruesit Plus do të kenë sërish mundësinë të përdorin modelin 4o, ndërsa do të shihet sa gjatë do të ofrohen modelet e mëparshme. Ai gjithashtu tha se do të dyfishohen kufijtë e përdorimit për GPT-5 për abonentët Plus dhe fajësoi një problem teknik në funksionin automatik të ndërrimit të modeleve, që e bënte GPT-5 të dukej “më i dobët”. Së shpejti, ndërfaqja do të ndryshojë për ta bërë më të lehtë kalimin nga një model te tjetri.
Mundesh me e lexu edhe...
Por zemërimi i përdoruesve nuk lidhet vetëm me 4o. Shumë prej tyre u ankuan se OpenAI fshiu gjatë natës tetë modele të ndryshme pa paralajmërim dhe pa dhënë një opsion për t’i mbajtur. Një përdorues shkroi se 4o e kishte ndihmuar jo vetëm në punë, por edhe gjatë periudhave të vështira me ankth dhe depresion, sepse “kishte ngrohtësi dhe mirëkuptim që ndihej njerëzor.”
Të tjerë thanë se ndihen sikur po përdorin një version falas, pavarësisht se paguajnë abonim, ndërsa disa e quajtën vendimin e kompanisë “goditje ndaj kreativitetit” dhe madje e lidhën me “kontroll shoqëror”. Një përdorues shpjegoi se çdo model kishte një përdorim specifik: 4o për ide kreative, o3 për logjikë, o3-Pro për kërkim të thelluar, 4.5 për shkrim, e kështu me radhë – dhe fshirja e tyre shkatërroi gjithë rrjedhën e punës.
Në rrjetet sociale, nga Reddit te Bluesky, po qarkullojnë shembuj të gabimeve të GPT-5, ndërsa shumë e konsiderojnë lançimin një dështim komunikimi. Altman pranoi në X se lansimi nuk shkoi siç ishte planifikuar. “Do të vazhdojmë të punojmë për ta bërë sistemin më stabil dhe do të vazhdojmë të dëgjojmë komentet e përdoruesve,” shkroi CEO i OpenAI. “Siç e përmendëm, prisnim disa vështirësi gjatë prezantimit të kaq shumë gjërave njëherësh, por pati pak më shumë pengesa nga sa kishim shpresuar!”/Katror.info
Përgatiti:
