Gushti s’pe ndal ritmin edhe pse vapa u rikthy me temperatura sahariane, përkundrazi, këtë javë skena jonë ka gjithçka, prej maratonave techno deri te jazzi elegant, bile edhe aktivizëm të duhun qytetar.
Në Pallatin e Rinisë, RAVE Travel pe feston 15-vjetorin me një “open air” të çmendun, ku vetë Sven Väth, pionieri gjerman i technos që prej viteve ’80, vjen me setin e tij maratonik e energjinë që s’shteret kurrë.
Në anën tjetër të Kosovës, Green Fest në Mitrovicë sjell temën “Toxicity” me muzikë, punëtori, debate e hiking, një miks arti e aktivizmi nga 13-17 gusht. Po më 16 gusht, Brezovica ngjallet me “Damn the Dams”, një koncert-protestë për mi shpëtu parqet kombëtare prej hidrocentraleve, me Asgjë Sikur Dielli, Shpat Dedën dhe Dren Abazin.
Mundesh me e lexu edhe...
Shkodra ka dy arsye me shku këtë javë: Youth Wave Festival në Shirokë (12 gusht), një festë rinore buzë liqenit me yje të rij e të afirmum nga Shqipnia e Kosova, dhe Shkodra Jazz Fest (deri më 31 gusht) që sjell emra të mëdhenj të jazzit klasik, bashkëkohor e latin në Teatrin Migjeni e nëpër skena të hapura të qytetit. Për një dozë folklori taman etnik, Ansambli Kombëtar Shqiptar osht në turne veror nëpër qytete të Shqipnisë.
Mu vesh pak ma drama-queen-that-whispers-hey-boy-look-at-me, po ju rekomandojmë Studio Rudinë. E për netët e ngadalta, merrni në dorë një libër që s’e shohim shpesh në raftet tona: “I Am God” nga Giacomo Sartori, ku Zoti dashunohet me një çikë edhe ja nisë ka pak me mendu krejt si njerëzit.
Me kcy: Sven Väth & plot tjerë / Pallati i Rinisë, Prishtinë
Këtë vit RAVE Travel osht tu e festu përvjetorin e 15 me plot koncerte dhe ngjarje superbe, dhe i tillë – supersuperb – osht edhe mysafiri i madh i verës, Sven Väth, DJ legjendar gjerman, pionier i muzikës elektronike dhe skenës techno që nga vitet ’80. Sveni osht i njohun për setet maratonike dhe energjinë e pashtershme, dhe si krijues i një komunitet global rreth soundit inovativ elektronik dhe atmosferës së veçantë në klubet e tij, sidomos Cocoon. RAVE ka punu me muaj për m’i pru Prishtinës një përvojë në qiell të hapur, kështu që krejt eventi ja nisë nga ora 16:00, me artistët to Hamzën dhe Liburnin, për me vazhdu një allnighter, deri sa Sven Väth ta mbyllë skenën nën yje. Ata që dojnë hala, mujn me shku te skena II nga ora 22:30, ku lëshojnë muzikë Fernando Costantini, Quest, Adiel dhe, në fund, Laurine që do të na shoqërojë deri në orët e para të sabahit. Biletat i gjeni këtu.
Me marrë pjesë: Green Fest / Mitrovicë
Green Fest osht pika kulmore e punës së organizatës simpatike-kreative-aktive 7 Arte në Mitrovicë, që synojnë me përdorë muzikën si medium për ngritjen e vetëdijes për zhvillimin e qëndrueshëm. Tema sivjet osht “Toxicity” dhe mbahet nga 13 deri 17 gusht në Mitrovicë. Ka punëtori, debate, hiking, pilates në natyre por ka edhe shumë muzikë t’mirë, ku performojnë artistë dhe grupe muzikore vendase dhe rajonale e që do ta përdorin muzikën e tyre për me ngritë vetëdijen rreth çështjeve mjedisore si dhe m’i frymëzu individët, komunitetin dhe krejt shoqninë me ndërmarrë veprime që na zgjojnë nga amullia e shkatërrimit të ambientit tonë. E keni La Fazanin, Gipsy Groove, Ahmet Kilic, Hawolf, po edhe Yll Limanin dhe Armend Rexhepagiqin që s’po ndalen këtë verë!
Me kcy: Programi javor i Bubble / Bubble Pub, Prishtinë
Pas një pushimi t’vockël Bubble po kthehet me programin e vet me muzikë eklektike nga kuratorë divers. Këtë javë e keni Gentin (16 gusht), Mirandën (15 gusht) dhe Raesën (13 gusht) që kanë m’u kujdes me ju shti me kcu, këndu, flirtu në qoshin urban n’qendër t’qytetit. Ma shumë info keni këtu.
Me dëgju e m’u aktivizu “Damn the dams” / Brezovicë
Qe edhe një festival “i gjelbërt”. Më 16 gusht 2025, në Brezovicë (tek parkingu i Molikës), organizata vendore Eco zone, bashkë me Riverwatch, Blue HEart River dhe Euronatur po organizojnë koncertin “DAMN – Remove Hydropowerplants from our National Parks”, me qëllim të avokimit m’i hjek hidrocentralet që sipas ekspertëve “po cenojnë rëndë lumenjtë, biodiversitetin dhe ekosistemet e mbrojtura të vendit tonë.” Llajnapi osht super: Asgjë Sikur Dielli, Shpat Deda dhe Dren Abazi. Gjatë ditës ke me pasë panair, hiking dhe aktivitete rekreative, ku do të promovohen të mirat natyrore të parqeve kombëtare, ndërsa në mbrëmje koncert me artistat tonë.
Me dëgju: Youth Wave Festival / Shirokë të Shkodrës, Shqipëri
Me 12 gusht e keni një festival rinor në Shirokë afër Shkodres. Super ambient, me plot yje pak ma të vjetër (edhepse Shpat Deda nuk osht i vjetër 🙂 dhe plot talente të reja muzikore nga Kosova dhe Shqipnia. Edhe transportin e kei flas nga Teatri Migjeni në qendër e deri te sheshi i katundit Shirokë. Eksperiencë rustike ama dinamike për këto ditë vape verore në pllazhën e liqenit ma të madh ballkanik.
Me kcy e me këndu: Turneu i Ansamblit Kombëtar Shqiptar/ Qytete të ndryshme Shqipëri
Plot prej juve e neve na ka ra me shku nëpër darsma çdo verë e me pretendu që po dëgjojmë “muzikë popullore” ama nëse e doni një dozë taman folklor shqiptar, për krejt juve që jeni kah Shqipnia këtë javë, që nga sonte në Vlorë e tutje e keni kalendarin artistik të muajit gusht që e çon Ansamblin Kombëtar të Këngëve dhe Valleve Popullore në një udhëtim përmes Shqipërisë, për me sjellë ma të bukurën e trashëgimnisë autentike muzikore në çdo qytet. Me kangë që mbajnë gjallë kujtesën e brezave, valle që burojnë nga përjetimi i përbashkët të traditës, qe ku e keni programin.
Me dëgju: Shkodra Jazz Fest / Shkodër
Sot po fillon Shkodra Jazz Fest dhe ka me vazhdu deri me 31 gusht. Festivali mbahet që nga viti 2005 dhe sjell në këtë qytet të bukur verior të Shqipnisë program veror me muzikë jazz, tu i bashku artistë nga Evropa Perëndimore, SHBA dhe skena vendore. Me emra si Diego Borotti, Michael Rosen, Jorge Pardo, Johannes Faber, Park Stickney e Markelian Kapedani, programi ka përfshi jazz klasik e bashkëkohor, etnik dhe latin. Përveç koncerteve në Teatrin Migjeni, sheshe e skena të hapuna, festivali ofron edhe punëtori për komunitetin muzikor dhe bashkëpunime ndërkombëtare. I dedikum violinistit Rrok Jakaj, festivali është sot një nga ngjarjet më të dashura të Shkodrës.
Mu vesh: Teshat e Studio Rudinë / Prishtinë
Nëse keni pas qef mu vesh bukur si princesha, ama sexy si personazhe t’filmave historik francez (tu e imagjinu Marie Antoinette kah thotë “Let them eat cakes”!) qe një koleksion i Studio Rudinë që shkëlqen me barok urban, zbukurime florale, korseta t’ngushtë, premje t’mirë, detaje super sensuale. Tesha t’mira për festivale, për ndeje t’gjata me shoqni në vneshta a lokacione rustike, po edhe party e dasma ku doni mu dok pak ma ndryshe edhe pak ma magnetike për vështrime e flirtime verore.
Me lexu: Libri “I Am God” nga Giacomo Sartori
Qe një libër, apo libërth, që na ka pëlqy këto javë pllazhore. “I Am God” i Giacomo Sartori osht një roman satirik, koxha e pazakontë, ku vetë Zoti osht protagonist dhe e merr fjalën për me tregu historinë e tij në formë të një ditari, inspirum prej një gruje në të cilën vetë Zoti, pabesushem edhe për neve edhe për to, osht dashuru. Ky nuk osht Zoti solemn e i largët që njohim nga librat e shenjtë, osht një narrator me humor të zi, plot ironi dhe që kadal-dale ja nis me shpërfaq edhe do ndjenja shumë njerëzore. I ndjekun nga obsesioni për atë çikën (e cila osht gjeneticiste por në kohë të lirë punon si eksperte për çiftëzimin e lopëve në ferma italiane), Zoti në këtë libër sillet e pshtillet mes reflektimeve kozmike dhe situatave të përditshme, tu i qitë në pah konceptet tradicionale të besimit, dashnisë dhe moralit. Me një stil të mprehtë e shpeshherë absurd, Sartori na fton me mendu mbi marrëdhanien mes hyjnores dhe njerëzores, tu e kthy librin në një përzimje filozofie, satire dhe rrëfimi frustrus dashnie. Fun read!/Katror.info
Marrë nga Suzanne Podcast.
