Të dhënat globale të kërkimeve në Google Trends nga maji deri në gusht 2025 tregojnë një rritje të fortë të interesit ndërkombëtar për Shqipërinë si destinacion kryesor veror.
Termat kyç si “Albania travel” dhe “Visit Albania” kanë dominuar kërkimet botërore, me kulmin më të lartë të interesit në fillim të gushtit, duke reflektuar një rritje të madhe të dëshirës për udhëtime drejt vendit tonë, ka mësuar Albanian Post.
Nga ana e vendeve me aktivitetin më të lartë kërkimor për turizmin shqiptar, përfshihen Maqedonia e Veriut, Nepali, Austria dhe Brazili, të cilët kanë shfaqur një interes të jashtëzakonshëm për “Albania travel”, duke treguar qëllim konkret udhëtimi.
Mundesh me e lexu edhe…
Në Evropë, vende si Rumania, Danimarka, Suedia, Polonia dhe Norvegjia gjithashtu kanë treguar angazhim të lartë, duke konfirmuar Shqipërinë si një destinacion tërheqës afër tyre.
Gjithashtu, rajoni i Lindjes së Mesme dhe Amerika e Veriut tregojnë një rritje të interesit me një shpërndarje më të balancuar të kërkimeve në terma të ndryshëm të lidhur me turizmin.
Përveç kësaj, Emiratet e Bashkuara Arabe dhe Arabia Saudite dallohen për interesin e theksuar në kërkime të tilla si “Visit Albania” dhe “Albania summer 2025”, duke reflektuar një fokus specifik ndaj pushimeve verore.
Në Mbretërinë e Bashkuar, Shtetet e Bashkuara, Kanadanë, Irlandë dhe Australi, interesi i kërkimeve është më i larmishëm, duke kombinuar pyetje praktike për udhëtime me kërkime të përgjithshme për turizmin.
Në një analizë të bërë nga Albanian Post, Maqedonia e Veriut dhe Austria shfaqën 100 për qind interes në kërkimin për “Albania travel”, ndërsa Shtetet e Bashkuara treguan një profil më të balancuar me 47 për qind kërkime për “Albania travel”, 19 për qind për “Albania tourism” dhe 25 për qind për “Visit Albania”.
Në Pakistan, interesat u përqendruan kryesisht tek “Albania travel guide” me 93 për qind, duke treguar nevojën për udhëzime më të hollësishme të planifikimit të udhëtimeve.
Përtej kërkimeve online, trendet e rezervimeve dhe sjelljet e udhëtarëve gjithashtu konfirmojnë këtë boom.
Sipas raportit të Lastminute.com për “Travel Horizons 2025”, rezervimet dhe kërkimet për bregdetin shqiptar u rritën me 100 për qind, duke qenë rritja më e madhe midis të gjitha rajoneve të studiuara.
Franca shfaqi një rritje të jashtëzakonshme prej 144 për qind në kërkimet për “Tiranën” për verën e 2025, duke treguar interes të madh për Shqipërinë.
Ndërkohë, të dhënat nga Mabrian tregojnë se Spanja e ka vendosur Shqipërinë ndër destinacionet kryesore për udhëtimet e verës, së bashku me vende të tjera si Portugalia dhe Italia.
Për më tepër, në një artikull të publikuar në maj nga The Guardian u zbulua se fluturimet nga Britania e Madhe drejt Shqipërisë u rritën me 61 për qind në 2024, duke reflektuar një interes në rritje edhe nga turistët britanikë.
Këto tendenca tregojnë qartë se Shqipëria vijon të mbetet një nga destinacionet më të kërkuara globalisht këtë verë./AP/Katror.info
